Partia Demokratike dhe aleatët e saj do të ndërmarrin sot aksionin e parë opozitar pas humbjes në zgjedhjet vendore të 21 qershorit, shkruan gazeta Panorama.
Debateve të shumta në mbledhjet e Grupit Parlamentar të PD-së dhe kërkesave të vazhdueshme të deputetëve demokratë për organizimin e protestave, kryetari i PD-së Lulzim Basha iu përgjigj pozitivisht më 24 nëntor, me vendimin për organizimin e protestës masive përballë selisë së Kryeministrisë.
Duke përzgjedhur 8 dhjetorin, Ditën e Rinisë, Basha që në fillim të artikulimeve të tij në lidhje me protestën e opozitës paralajmëroi një përsëritje të ngjarjeve të vitit 1990 dhe nevojën për zhvillimin e zgjedhjeve të parakohshme.
Pamundësia e reagimit qytetar përballë aksioneve të qeverisë kanë krijuar bindjen tek opozita se protesta e sotme do të jetë masive. Në funksion të kësaj, kreu i PD-së Basha ka zhvilluar ditët e fundit takime intensive me drejtuesit e PD-së në rrethe dhe kryetarët e bashkive të djathta.
Partia Demokratike ka marrë leje nga organet e rendit për të zhvilluar një protestë që do të zgjasë rreth katër orë, por parashikimet e opozitës janë më të mëdha.
Demokratët do të testojnë fillimisht reagimin e qytetarëve dhe angazhimin e tyre për të treguar rezistencën përballë qeverisë dhe më pas do të vendosin për shtrirjen në kohë të protestës.
Burime nga selia blu bëjnë me dije se orari i kërkuar për zhvillimin e protestës nuk do të jetë element pengues në rast se qytetarët do të kërkojnë që aksioni i nisur të vijojë. Sipas demokratëve, qëllimi i organizimit të protestës së sotme për PD-në është i qartë dhe lidhet drejtpërdrejt me rrëzimin e qeverisë dhe organizimin e zgjedhjeve të parakohshme. Protesta e demokratëve do të vazhdojë edhe përgjatë mbrëmjes, nëse qytetarët dhe përfaqësuesit e opozitës do të vazhdojnë rezistencën e tyre.
Partia Demokratike do të kujdeset për mbarëvajtjen e protestës, në krye të së cilës do të jenë anëtarët e Forumit Rinor Demokrat. Por, sipas përfaqësuesve të opozitës, protesta e sotme nuk është vetëm e demokratëve, po edhe e qytetarëve, të cilët janë prekur drejtpërdrejt nga masat represive të reformave dhe aksioneve të qeverisë.
Në funksion të kësaj, organizatorët kanë menduar që pjesa më e madhe e protestuesve që do të marrin fjalën në podiumin e ngritur përballë Kryeministrisë do të jenë përfaqësues të biznesit të vogël, studentë, qytetarë të prekur nga aksioni i energjisë elektrike, fermerë, shtresa shoqërore, të cilat Basha i ka takuar përgjatë muajve të fundit në turin “Fjalën e kanë qytetarët”.
Fjala e kryetarit të opozitës, Basha, është ideuar të ndodhë në përfundim të fjalimeve.
Duke paralelizuar protestën e djeshme me atë të ndodhur në dhjetor të vitit 1990, fjalën pritet ta marrin edhe kasta e vjetër e PD-së, Arben Imami, Astrit Patozi e të tjerë.
PANORAMA
