Një ditë më parë Forumi Rinor i Partisë Dmoekratike dhe Lëvizja Rinore për Integrim organizuan një protestë para Ministrisë së Brendshme.
Një ditë më pas, policia ka proceduar penalisht organizatorët.
Mes tyre është edhe kreu i FRPD Belind Këlliçi.
“Më datë 29.05.2018, u referuan materialet në Prokurorinë pranë Gjykatës së Shkallës së Parë Tiranë, për shtetasit B.K., 31 vjeç, A.K. 29 vjeç, G.Gj. 30 vjeç, H.V. 27 vjeç, G.T. 42 vjeç, S.B. 22 vjeç, M.U. 31 vjeç, F.H. 48 vjeç dhe K.Gj. 48 vjeç (banues të gjithë në Tiranë) bazuar në nenin 262/1 të Kodit Penal”, raporton policia.
Referuar Kodit Penal, “organizimi i grumbullimeve dhe i manifestimeve të personave në sheshe dhe vende të kalimit publik, pa marrë më parë lejen nga organi kompetent sipas dispozitave të veçanta apo kur nga organizatorët shkelen kushtet e parashtruara në kërkesën për dhënie të lejes, përbën kundërvajtje penale dhe dënohet me gjobë ose me burgim gjer në një vit.
Pjesëmarrja në një grumbullim apo manifestim të paligjshëm edhe pas paralajmërimit të bërë për shpërndarje, përbën kundërvajtje penale dhe dënohet me gjobë ose me burgim gjer në tre muaj”.
Nuk dihet nëse të rinjtë kanë marrë leje në polici, apo e kanë tejkaluar atë.
Protestuesit çuan një gomone dje para Ministrisë së Brendshme si dhe disa pako të zeza për të simbolizuar protestën e tyre kundër lidhjeve të pushtetit me trafikun e drogës. Ata kërkuan dorëheqjen e Xhafajt, ndërsa hodhën vezë dhe peshq në drejtim të institucionit./a.m.
Protesta e FRPD para Ministrisë së Brendshme, procedohen organizatorët
