Kryetari i Partisë Republikane, Fatmir Mediu thotë se protesta e 12 nëntorit, që do të organizohet nga opozita, duhet të zhvillohet në çdo qytet, jo vetëm në Tiranë.
Në një intervistë për Euronews Albania, Mediu nënvizoi se për opozitën, është e rëndësishme që përmes protestave të arrijë qëllimet e saj.
“Mendoj që të gjitha lëvizjet e opozitës duhet të jenë shumëplanëshe. Nuk duhet të jetë thjesht protesta, të ketë qëllim në vetvete se sa njerëz mblidhen. E rëndësishme është që, ajo çfarë ndodh në Tiranë, të zhvillohet në çdo qytet dhe në skajin më të largët të Shqipërisë. Pra, zëri i protestës nuk duhet të jetë e gjithë Tirana, por e gjithë Shqipëria. Vetëm atëherë do mund të kemi një raport të drejtë me qytetarët shqiptarë”, theksoi ai.
Kryetari i Partisë Demokratike, Sali Berisha deklaroi se më 12 nëntor, do të zhvillohet protesta e opozitës, çka do të shënojë sipas tij, fillimin e betejës kundër qeverisë së drejtuar nga kryeministri Edi Rama.
Në një deklaratë për mediat nga selia blu, Berisha u shpreh se në të gjithë vendin , po bien sirenat e alarmit ndaj gjendjes katastrofale që gjendet Shqipëria, për shkak të keqqeverisjes.
/s.f
