Partitë në pushtet do të presin kalimin e 17 shkurtit për ta caktuar seancën e Kuvendit me të vetmen pikë të rendit të ditës: votimin e presidentit të Kosovës, shkruan “Koha Ditor”. Megjithëse përgatitjet ishin bërë që seanca të mbahet të hënën, më 15 shkurt, burime të gazetës kanë thënë se kjo ka pak gjasa të ndodhë, pasi partnerët e koalicionit, me përkrahjen edhe të ndërkombëtarëve janë pajtuar që pasardhësin e Atifete Jahjagës ta votojnë pas protestës së opozitës, e paralajmëruar të mbahet Ditën e Pavarësisë. Përveç kësaj, koalicioni ende nuk i ka të sigurta votat e nevojshme për zgjedhjen e presidentit, ndërsa më 17 dhe 18 shkurt në Kosovë nuk do të jetë as kryetari i Kuvendit, Kadri Veseli, i cili në axhendë ka një udhëtim për në Bruksel.
