Analisti Ilir Demalia ka reaguar pas një interviste të poetes Natasha Lako e cila tregonte sfidat e ditëve të para të demokracisë me rastin e 27 vjetorit të themelimit të Partisë Demokratike.
Demalija shprehet se edhe Lako i ka shërbyer sistemit komunist me devotshmëri pavarësisht se çfarë thotë sot.
Ai thotë se ajo ka vënë në dispozicion të diktaturës veprën e saj dhe prapë vazhdon të jetë në qendër të vëmendjes, duke shtuar se po lihen në heshtje figura të shquara të kulturës, mendimit dhe klerit shqiptar, si Patër Anton Harapi.
“Ajo Shqipni që kem mendue e dona unë e ti, nuk bahet me shqiptarë të sodit”. Në “Gazeta Shqiptare”, më 17 dhjetor 2017, Natasha Lako tregon se si ka qenë një hap pranë vdekjes, në vitin 90′ dhe ‘91.
Intervista është fund e krye si frymë vazhdim i realizmit socialist, ku janë edukuar, kanë punuar, kanë prodhuar mostra letrare, filma, teatër e gjithçka, në shërbim ideologjik e politik të një regjimi diktatorial, nga më brutalët në botën komuniste.
Ajo që vazhdon me pafytyrësi nga e gjithë kjo armatë e shërbëtorëve të propagandës kriminale të regjimit komunist shqiptar, është se: përpos që mbrojnë veprën e realizuar në shërbim të diktaturës dhe diktatorit si një shpëlarje gebelsiane trush ndaj popullit për ta mbajtur në errësirë me artin e tyre makabër dhe të pavlerë, sot, jo vetëm që na mbahen me të madh me këtë si “art i madh dhe me vlera”, por tregojnë dhe në çfarë “rreziku për jetën” kanë qenë nga diktatura, duke na dalë që këta i dhanë shqiptarëve “Nata e parë të lirisë”, si dhe skenari i filmit të Natashës me të njëjtin titull, për hyrjen e partizanëve në Berat, në 1944.
Po t’i ndjekësh me kujdes, këta, përsëri janë trup bashkuar me njëri-tjetrin si regjim politik dhe kulturor në sundim, si vazhdimësi e së njëjtës kulturë dhe elitë, si vazhdimësi e të njëjtit shërbim, lidhjeve dhe shërbimit me pushtetin dhe me të keqen e këtij pushteti, që vazhdon si vazhdimësi e po atij pushteti, që i shërbyen dje dhe i shërbejnë dhe sot me mizantropinë e mendjeve të vogla të shërbëtorit për përfitime të mëdha, duke manipuluar dhe simuluar, duke u plastikuar operacionalisht me të shkuarën nëpërmjet gënjeshtrave dhe mashtrimeve, për përfitime të reja në çdo vakt,” argumenton ndër të tjera Ilir Demalia.
