Shtatë persona kanë rënë në pranga, mes të cilëve 6 shqiptarë dhe 1 italian, nga policia e vendit fqinj si pjesë e një grupi të strukturuar kriminal që merrej me prostitucion. Lajmi bëhet i ditur nga mediat italiane sipas të cilave organizata kriminale merrej me trafikun e qenieve njerëzore nga Shqipëria për në Itali, dhe të shfrytëzimit të prostitucionit në Napoli.
Sipas mediave italiane, katër prej shqiptarëve të arrestuar janë lënë në burg ndërsa 3 të tjerë janë me “arrest shtëpie”. Rrjeti i prostitucionit zhvillonte aktivitetin e tij në zonën “Vicaria Mercato”, ndërsa shfrytëzimi i femrave në rrugë bëhej në zona të ndara për të “evituar konfliktet me grupet e tjera”.
“Trajtimi i prostitutave ishte i organizuar dhe ato monitoroheshin nga një “truproje” që kontrollonte vajzat, e zgjedhur mes prostitutave më eksperte ose që kishin treguar besueshmëri në kohë”, shkruan “il Gazzettino”.
Femrat e shfrytëzuara për prostitucion thuhet se vinin nga Shqipëria, por edhe nga vende të tjera të Europës. Rrjeti i prostitucionit sipas policisë ishte i përbërë nga djem shumë të rinj, të cilët drejtonin një ose më shumë vajza. Policia thuhet se ka zbuluar edhe lidhjet se si zhvillonin aktivitetin e tyre të jashtëligjshëm.
“Kur njëri prej tyre kishte probleme me drejtësinë italiane dhe ishte i detyruar të largohej për në Shqipëri, miqtë e tij vinin për ta zëvendësuar në të njëjtin rol që kishte, duke bërë që organizata të mos e humbiste dominimin mbi territorin”,thuhet në deklaratën e policisë, sipas “il Gazzettino”.
