Ndikim minimal ekonomik kanë pasur të gjitha mbledhjet e përbashkëta të Qeverisë së Kosovës dhe asaj të Shqipërisë.
Ende ka barriera të procedurave doganore, për të zhvilluar tregtinë mes Shqipërisë dhe Kosovës, ndërsa politikat subvencionuese që qeveri të ndryshme të rajonit aplikojnë për sektorë të veçantë, e kanë bërë tregun shqiptar jokonkurrues në rajon, shkruan Koha Ditore.
Ky ka qenë shqetësimi që ka ngritur kryetari i Odës Ekonomike të Kosovës, Safet Gërxhaliu, të premten në Tiranë.
Drejtuesit e OEK-ut dhe ata të Dhomave të Tregtisë e Industrisë të Tiranës (DHTI) kanë propozuar përgatitjen e kushteve për heqjen e pikave doganore mes Shqipërisë e Kosovës.
Në funksion të kësaj Oda Ekonomike e Kosovës dhe Dhoma e Tregtisë dhe e Industrisë në Tiranë kanë themeluar të premten, në Tiranë, Zyrën e Bashkëpunimit të Biznesit, përgatiti Koha. (b.an)
