Propozimi i Partisë Demokratike për përdorimin e mjeteve të identifikimit të huaja ka ngjallur shqetësime lidhur me transparencën e procesit, nëse kjo kërkesë do të realizohej.
Kryetari i Komisionit Qendror të Zgjedhjeve, Ilirjan Celibashi, i ftuar në emisionin “Real Story”, preferoi të mos komentonte këtë kërkesë të PD, por theksoi se nëse partitë arrijnë një marrëveshje, atëherë do të realizohet.
Ai sqaroi se procesi i votës së Diasporës është i bazuar në krahasimin e pamjes së fytyrës me atë që është në dokumentin e identifikimit dhe të dhënave në regjistrin shtetëror. Celibashi shtoi se nëse miratohet përdorimi i dokumenteve të huaja, PD ka kërkuar përdorimin e dokumenteve të BE-së, Britanisë ose SHBA-së, dhe se verifikimi i tyre do të bëhej duke krahasuar të dhënat, pa përfshirë fotografinë që ndodhet në regjistër. Ky proces, sipas tij, do të kërkonte një zgjerim të sistemit aktual.
Nëse arrihet një dakordësi mes palëve, sistemi mund të përshtatet, edhe pse duhet marrë parasysh çështja e afateve. Celibashi gjithashtu theksoi se rreth 160,213 shtetas nuk kanë aplikuar ende për kartë ID ose pasaportë biometrike, dhe mund të jenë lindur jashtë vendit ose kanë lëvizur para se të niste implementimi i këtij sistemi. Ky sistem aktual krahasohet vetëm me të dhënat e shtetasve që disponojnë një mjet identifikimi shqiptar.
