Presidenti Bajram Begaj dekretoi këtë të mërkurë, më 4 mars, ndryshimet në kabinetin qeveritar të propozuara më herët nga Kryeministri Edi Rama.
Dy ditë më parë, kryeministri Rama zhvilloi një takim me Presidentin Begaj në Pallatin e Brigadave, ku i paraqiti propozimin për shtatë ndryshime në kabinetin qeveritar, të cilat tashmë janë zyrtarizuar me dekret presidencial.
Me dekretimin e kreut të shtetit, hapi i radhës procedural është paraqitja e ndryshimeve në Kuvendin e Shqipërisë, ku ministrat e rinj pritet të marrin votëbesimin e deputetëve për të hyrë zyrtarisht në detyrë.
Riorganizimi i kabinetit qeveritar “Rama” erdhi pas mbledhjes së grupit parlamentar të PS, duke prekur disa nga dikasteret më të rëndësishme të ekzekutivit.
Presidenti dekretoi shkarkimin nga detyra të:
- Belinda Balluku, Zëvendëskryeministër dhe Ministre e Infrastrukturës dhe Energjisë;
- Elisa Spiropali, Ministre për Evropën dhe Punët e Jashtme;
- Pirro Vengu, Ministër i Mbrojtjes;
- Albana Koçiu, Ministre e Punëve të Brendshme;
- Besfort Lamallari, Ministër i Drejtësisë;
- Toni Gogu, Ministër i Shtetit për Marrëdhëniet me Parlamentin.
Presidenti dekretoi emërimin në detyrë të:
- Albana Koçiu si Zëvendëskryeministre;
- Ferit Hoxha si Ministër për Evropën dhe Punët e Jashtme;
- Besfort Lamallari si Ministër i Punëve të Brendshme;
- Ermal Nufi si Ministër i Mbrojtjes;
- Toni Gogu si Ministër i Drejtësisë;
- Enea Karakaçi si Ministër i Infrastrukturës dhe Energjisë;
- Erjona Ismaili si Ministre e Shtetit për Marrëdhëniet me Parlamentin.
LEXO KËTU profilet e ministrave të rinj
