Omer Mano, deputeti i Partisë për Drejtësi Integrim dhe Unitet prezantoi para deputetëve të Komisionit të Shëndetësisë draftin për dhënien e statusit e punonjësve të industrisë së naftës dhe gazit.
Ndryshimet ligjore për këtë kategori propozohen pas 25 viteve dhe përfituesit do të jenë rreth 5000 persona.
Në propozim kërkohet ulje e moshës së pensionit për 5 vjet për të gjithë punonjësit. Pra 60 vjeç për meshkujt, nga 65 që është aktualisht mosha e përfitimit të pensionit të pleqërisë dhe për gratë ulje të moshës nga 60 në 55 vjeç.
Mano: Nuk kam kërkuar më shumë për ta, kam kërkuar atë që atyre ua kanë mohuar dhe është e drejtë e tyre. Të dalin në pension në moshën 60 vjeç dhe gratë të dalin në moshën 55 vjeç.
Mano thotë se kërkesa e tij vjen pasi i njeh vështirësitë e naftëtarëve në terren, mungesën e investimeve dhe lodhjen fizike të tyre.
Mano: Në parlament e kam gjetur veten jo si deputet, por si ish-naftëtar për sa i përket këtij statusi. Ky status është mbështetur nga të gjitha forcat politike.
Deputeti i PDIU-së përfshin edhe trajtiminin shëndetësor të punjësve të industrisë së naftës. Ndryshimi i propozuar për moshën e përfitimit të pensionit të pleqërisë ka efekte në buxhetin e shtetit përllogaritur paraprakisht në masën 400 mln lekë, shkruan oranews. Për këtë arsye, Komisioni i Shëndetësisë do ia referojë projektligjin Ministrisë së Financave./a.k
