Victoria Nuland është eksperte e negociatave të vështira në konfliktet globale, por në Tiranë ajo ishte në një përpjekje të fundit të Shteteve të Bashkuara për arritjen e një kompromisi për Reformën në Drejtësi.
Dy partitë e mëdha kanë mbi tryezë një propozim të ri me autorësinë e amerikanëve.
Dhe ndihmëssekretarja e shtetit ishte shumë e qartë me mesazhin e saj.
Sipas formulës së re, mësohet se opozita do të ketë më shumë rol në procesin e seleksionimit të kandidaturave të propozuara për në komisionin e vetingut.
Në këtë mënyrë, gjendet një rrugë e mesme, mes këmbënguljes së opozitës për vende të rezervuara në komisionin e vetingut dhe qëndrimit të palëkundur të maxhorancës për të mos prekur formulën e deritanishme për përbërjen e komisionit të vetingut.
Mësohet se gjatë takimit me Nuland, Lulzim Basha i ka paraqitur zyrtares amerikane dhe shqetësimin e tij për rolin ekzekutiv që i jepet në draftin aktual monitoruesve ndërkombëtarë në procesin e vetingut të gjyqtarëve dhe prokurorëve.
Basha i ka paraqitur zonjës Nuland propozimin që operacioni ndërkombëtar i monitorimit të mos ketë kompetenca ekzekutive, por kompetenca vëzhguese dhe monitoruese.
Ai ka kërkuar që të gjendet një formulë ku të mos jenë ndërkombëtarët ata që do të gjykojnë dhe vendosin se cilët nga lista e kandidatëve duhet të jenë anëtarë të komisionit të vetingut, por kjo të bëhet nga përfaqësuesit që Parlamenti do të zgjedhë.
Pritet një përgjigje nga SHBA për të toleruar vijën e kuqe, apo PD do të pranoj propozimin amerikan? Kanë ngelur vetëm 10 ditë kohë…
dita/d.i.