Pranimet në universitet kanë shkaktuar një kaos të madh. Edhe pse drejtuesit më të lartë të Ministrisë së Arsimit dhe qeverisë kanë thënë se në raundin e dytë do ketë shans për ata maturantë që nuk kanë e kanë gjetur veten në listat e fituesve paraprakë, situata në raundin e dytë të aplikimeve në universitet do jetë po kaq kaotike. Arsyeja është se maturantët, edhe në raundin e dytë në formularin e aplikimit do të përzgjedhin 10 degë dhe përqindja më e lartë e tyre do dalë fitues në shumë prej tyre, duke zënë kuota studimi në mënyrë fiktive.
Për ekspertin e arsimit, Fatmir Vejsiu, zgjidha do ishte që në raundin e dytë studentët të shpallen fitues në preferencën më të lartë, pra të ndiqet procedura e vjetër, ku Formulari i Aplikimit e kishte emrin formular A2 dhe renditja e preferencave kishte peshë. “Zgjidhje për këtë situatë do ishte që në raundin e dytë të ndiqet rruga e viteve të mëparshme, ku kandidati të shpallet fitues në preferencën më të lartë. Pra, të renditen preferencat si në formularin A2, ku renditja kishte rëndësi të madhe”, sqaron Vejsiu. Faktikisht, kjo gjë është kërkuar edhe nga maturantët gjatë dy protestave të tyre. Ndërkohë që për drejtoreshën e Agjencisë Kombëtare të Provimit, edhe pse në raundin e dytë do të ketë sërish kuota bosh, kjo nuk përbën problem, pasi në udhëzimin e Ministrisë së Arsimit, përcaktohet se universitet do t’i plotësojnë kuotat bosh me studentët që janë renditur poshtë vijës së kuqe, duke respektuar renditjen e tyre.
GARA NË UNIVERSITET
Pjesë e garës në universitetet janë bërë në total 27.672 maturantë, të cilët garojnë për një total prej 31.579 kuotash pranimi në 34 universitete publike dhe private. Vetëm në 12 universitete publike janë rreth 22.420 kuota pranimi për vitin e ri akademik 2016-2017, pa përfshirë kuotat për trojet dhe kuotat e veçanta./GSH/a.m.
