Pronari i një lokali plagos me armë klientit, por nuk ndalet me kaq, i turret për ta vrarë.
Polica e Tiranës thotë se shërbimet e Komisariatit të Policisë Nr. 5, në bashkëpunim me forcën e posaçme “Shqiponjat”, kanë parandaluar përshkallëzimin e mëtejshëm të një konflikti me armë zjarri, që mund të përfundonte në vrasje.
Pas njoftimit të marrë rreth orës 02:20 të natës, ende pa zbardhur e enjtja, se në Kodër Kamzë, në një lokal, kishte një konflikt verbal e fizik mes pronarit të lokalit dhe një klienti, efektivët e policisë kanë shkuar menjëherë në drejtim të adresës së dhënë.
Bashkëpronari i lokalit, F. K., 35 vjeç, banues në Tiranë, në brendësi të lokalit është përfshirë në një konflikt fizik e verbal për motive të dobëta, me shtetasin R. C., klient lokali.
Më pas konflikti ka vijuar në ambientet e jashtme të lokalit, ku gjatë tij 35-vjeçari F. K., ka plagosur me armë zjarri në dorë, shtetasi R. C., 39 vjeç., i cili u dërgua në spital dhe ndodhet jashtë rrezikut për jetën.
Në momentin që shtetasi F. K., po qëllonte përsëri në drejtim të shtetasit të plagosur, ndërhyrja në kohë e punonjësve të policisë ka bërë të mundur parandalimin e vrasjes, duke i hequr armën nga dora shtetasit F. K., dhe duke e prangosur atë.
Lidhur me këtë ngjarje hetimet janë në vijim, ndërsa materalet iu referuan Prokurorisë Tiranë, për veprat penale “Vrasja, e mbetur në tentativë” dhe “Armëmbajtja pa leje”.
/a.r
