Prokurorja e Apelit të Tiranës, Fatjona Memçaj ka kaluar me sukses procesin e vettingut, duke u bërë zyrtarja e dytë e sistemit të drejtësisë që konfirmohet në detyrë.
Komisioni i Pavarur i Kualifikimit vendosi këtë të enjte, se pasuritë e prokurores janë të vendosura në mënyrë të ligjshme, ka integritet profesional dhe nuk është e përfshirë në raste abuzive apo korrupsioni.
Fatjona Memçaj është njëherazi edhe anëtare e Këshillit të Emërimeve në Drejtësi.
Komisioni i Pavarur i Kualifikimit, përfaqësohej nga Alma Faskaj, Roland Ilia dhe Firdes Shuli
Memçaj ka qenë subjekt i deklarimit të pasurisë prej vitit 2003, kur kryente detyrën e prokurores pranë Prokurorisë së rrethit Tiranë. Në vitin 2007, Memçaj ka punuar si drejtoreshë e Koordinimit Ligjor në Presidencë, detyrë të cilën e ka mbajtur deri në fund të vitit 2012. Më pas, Memçaj është emëruar drejtore kabineti në Prokurorinë e Përgjithshme dhe prej vitit 2013 mban pozicionin e prokurores së Apelit në Tiranë.
Memçaj ka deklaruar në ILDKPI një apartament banimi 96 m me vlerë 27.800 dollarë, makine Vespa dhe llogari bankare. Edhe DSIK, Drejtoria e Sigurimit të Informacionit të Klasifikuar, e cilëson figurë të përshtatshme.
Sipas hetimit administrativ, i konfirmuar edhe nga vendimi i së enjtes, pasuria e Memçajt është e justifikuar me burime të ligjshme.
Fatjona Memçaj është subjekti i gjashtë që përballet me procesin e vetingut dhe e dyta e rikonfirmuar në detyrë, pas Vitore Tushës së Gjykatës Kushtetuese. Komisioni i Pavarur i Kualifikimit ka shkarkuar nga detyra anëtarin e Kushtetueses, Fatos Lulo, gjyqtarin e Apelit në Durrës, Besim Trezhnjeva dhe prokuroren e Apelit në Shkodër, Besa Nikëhasani. /a.m.
