Prokuroria e Tiranës ka caktuar ekspertë të huaj për të bërë edhe njëherë ekspertimin mjeko-ligjor, i cili do të përcaktojë shkakun e vdekjes së 3-vjeçarit, Brian Spahiu. Vendimi është marrë pasi nga Prokuroria pretendohet se ekspertiza e parë që është bërë është e paplotë dhe konkluzioni i vdekjes është i pasaktë. Kështu që duke marrë parasysh që specialistët në vendin tonë janë në konflikt interesi me personat nën hetim, ekspertiza do të bëhet nga mjekë të huaj. Megjithatë nuk dihet nëse do të merret ndonjë masë për mjekët që kryen ekspertizën e parë për vdekjen e të miturit, pasi mesa duket nuk e kanë kryer detyrën e tyre ashtu siç duhet.
“Nga ana e prokurores së çështjes është vendosur kryerja e riekspertimit mjekoligjor dhe ekspertimit mjekoligjor shtesë, duke caktuar një grup ekspertësh të huaj, për shkaqet e mëposhtme:
1-Akti i ekspertimit mjekoligjor i kryer nga ekspertet e IML-së eshte i paplotë, i paarsyetuar dhe ka mangësi të theksuara në konkluzionet e arritura lidhur me shkakun e vdekjes së të miturit B.S;
2- Nga hetimet dhe pyetja e eksperteve që e kanë marrë përsipër dhe e kanë kryer këtë akt ka rezultuar se ata nuk janë të specializuar dhe nuk kanë njohuri të posacme në fushat objekt të ekspertimit, dhe në arritjen e konkluzionit që kanë paraqitur në aktin e ekspertimit nuk kanë kryer konsultat me mjekë të tjerë specializuar në këto fusha.
3- Kryerja e riekspertimit mjekoligjor që përcakton shkakun e vdekjes është kusht i domosdoshëm edhe për kryerjen e ekspertimit mjekoligjor shtesë, për të përcaktuar nëse ka shkelje të rregullave të protokollit dhe deontologjisë mjekësore nga të gjithë mjekët dhe stafi mjekësor (stomatolog, anestezist etj.) që kanë kryer ndërhyrjet përkatëse, mjekuar dhe trajtuar të miturin B.S .
4- Për vërtetimin e rrethanave të kryerjes së veprës penale dhe individualizimin e përgjegjësive penale konkrete dhe nisur nga fakti që në rastin konkret kërkimet dhe vlerësimet janë shumë komplekse dhe kërkojnë njohuri të ndryshme në disa degë të mjekësisë lind e domosdoshme caktimi i disa ekspertëve për kryerjen e riekspertimit mjekoligjor dhe ekspertimit shtesë.
5- Instituti i Mjekësisë Ligjore nuk ka ekspertë të specializuar në të gjitha fushat objekt të ekspertimit të sipërpërmendur.
6- Mjeket e tjerë që janë të specializuar në këto fusha në Shqipëri , janë në një numër të kufizuar dhe ushtrojnë funksionin e mjekut në institucione mjekësore, ku kanë punuar me mjekët e përfshire ne hetim dhe kanë njohje me ta , duke ndikuar në këtë mënyrë në paanësinë dhe objektivitetin e kryerjes se ekspertimit prej tyre. Aktualisht , jemi në pritje te kryerjes se procedurave ligjore për dërgimin e vendimit me letërporosi autoriteteve juridike të huaja,”-thuhet në përgjigjen që Prokuroria e Tiranës ka kthyer për News24.
Menjëherë pas dërgimit në banesë, djalit i është rritur edhe temperatura, gjë që ka alarmuar prindërit të cilët e kanë dërguar më pas në Pediatrinë e QSUT-së, ku Brian është intubuar për shkak se sipas mjekëve, mëlçia e tij kishte dalë jashtë funksionit. Ai ka qëndruar në terapi, e cila nuk ka dhënë rezultat dhe më 1 tetor, i vogli ka humbur jetën. Prindërit e fëmijës kanë kallëzuar në Polici, por deri më tani, askush s’është vënë në pranga./m.j
