Prokuroria e Krimeve të Rënda i ka fokusuar hetimet për përgjimin e vëllait të ministrit Xhafaj në Vlorë.
Në fokus të hetimeve është personi i përmendur në video me emrin “Ermal”, që do të ndihmonte “Dëshmitarin X” të bënte trafikun e drogës.
Burime brenda organit të hetimit thonë për Panorama, se dy oficerë të Policisë Gjyqësore kanë qenë në qytetin e Vlorës në kërkim të të dhënave për personin e quajtur “Ermal”.
Fillimisht janë verifikuar oficerë Policie me këtë emër dhe më pas kanë nisur kërkimet për persona të tjerë që mund të kenë lidhje me trafikun.
Ndërkohë javën e ardhshme pritet që prokuroria të marrë përgjigjen nga ekspertiza italiane në lidhje me autenticitetin e audio- përgjimit të publikuar nga PD. Kujtojmë se Ministri i Brendshëm Fatmir Xhafaj sfidoi publikisht liderin e opozitës Lulzim Basha, duke deklaruar se nëse rezulton i vërtetë përgjimi ai do të japë dorëheqjen, por në të kundërt, duhet të jetë Basha ai që duhet të përballet me dënimin e shpifjes dhe mashtrimit. /b.d
