Prokuroria e Kukësit ka nisur hetimet për protestën e dhunshme në Kalimash, ku u shkatërruan sportelet e pagesës së Rrugës së Kombit.
Përmes një njoftimi zyrtar, bëhet me dije se kryeprokurorja Arta Marku po ndjek me vëmendje këtë ngjarje. Ndërkohë, drejtuesja e Prokurorisë së Kukësit, Alketa Nushi, së bashku me disa prokurorë të tjerë, shkuan në vendgjarje dhe po punojnë për të gjetur autorët dhe shkaktarët e dhunës.
Kryeprokurorja Marku ka vendosur në dispozicion të Prokurorisë së Kukësit të gjitha burimet logjistike dhe njerëzore për zhvillimin me intensitet dhe rezultativ të hetimeve dhe vendosjen përpara përgjegjësisë penale të personave që kanë shkelur ligjin. Hetimet janë duke u kryer edhe me Policinë e Shtetit, thuhet në njoftimin e organit të akuzës.
Nga protestat e dhunshme ditën e sotme, u lënduan 13 efektivë policie dhe disa protestues.
Turma e qytetarëve shkatërroi dhe i vendosi zjarrin kabinave të koncesionarit që shërbejnë për pagesën e tarifës në Rrugën e Kombit.
Njoftimi i kryeprokurorisë
Prokuroria e Përgjithshme po ndjek me vëmendje ngjarjet e zhvilluara në protestën e paradites së 31 marsit në segmentin rrugor pranë Tunelit të Kalimashit në Rrugën e Kombit.
Prokuroria e Përgjithshme, Kryeprokurorja znj.Arta Marku, uron shërimin e shpejtë të të lënduarve në protestë.
Ndërkohë, Prokuroria e Rrethit Gjyqësor Kukës, Drejtuesja e saj Alketa Nushi me një grup prokurorësh të kësaj prokurorie, shkuan në vendgjarje dhe po punojnë për të gjetur autorët dhe shkaktarët e dhunës.
Kryeprokurorja Arta Marku kërkon, mbështet dhe vë në dispozicion të Prokurorisë së Kukësit të gjitha burimet logjistike dhe njerëzore për zhvillimin me intensitet dhe rezultativ të hetimeve dhe vendosjen përpara përgjegjësisë penale të cilitdo që ka shkelur ligjin.
Prokuroria është në komunikim të vazhdueshëm dhe në bashkëpunim me Policinë e Shtetit, po kryen hetime për zbardhjen e ngjarjes.
a.ç
