Prokuroria e Tiranës ka kërkuar në total 34 vite burg për 17 ish-inspektorë të Inspektoratit Ndërtimor Urbanistik Vendor të Bashkisë Tiranë. Mes të pandehurve është edhe ish–drejtuesi Florenc Hoxha. Sipas organit të akuzës, të gjithë këta persona akuzohen për veprën penale të “Shpërdorimit të detyrës”.
Vetëm për Hoxhën, Prokuroria ka kërkuar 6 vite burg si dhe heqjen e së drejtës për të ushtruar detyra publike për tri vite. Ndërsa për 16 vartësit e tij prokuroria ka kërkuar heqjen e së drejtës për të ushtruar detyra publike për një vit. Mësohet se 17 të pandehurit kanë pranuar gjykimin e shkurtuar, ndaj në rast dënimi nga gjykata ata përfitojnë uljen e dënimit me një të tretën. Sipas Prokurorisë së Tiranës, thuhet se është e provuar se Florenc Hoxha ka shpërdoruar detyrën në 531 raste. Ndërsa, vartësit e tij kanë shpërdoruar detyrën gjithsej 690 herë. Sipas hetuesve të çështjes, ka rezultuar se këta persona kanë lejuar ndërtimet e paligjshme në të gjitha zonat e kryeqytetit, duke pasur dijeni lidhur me këtë fakt.
Hetimet
Hetimi lidhur me këtë çështje përfshin periudhën korrik 2012-dhjetor 2013. Mësohet se kallëzimi është bërë nga IKMT-ja dhe hetimet mbi shkeljet e tyre janë ndjekur më pas nga njësia Task-Forcë e Prokurorisë së Tiranës. Ndërkaq, në dosje thuhet se “është proceduar me vendime pezullimi dhe gjoba për shkeljet e konstatuara, por në asnjë rast nuk është proceduar me vendim për prishje të objekteve të ndërtuara pa leje.
Për ndërtimet pa leje, që INUV-i ka konstatuar dhe ka proceduar me vendim pezullimi, rezulton se pavarësisht kësaj vendimmarrjeje, ndërtimet janë përfunduar. Lidhur me mbajtjen e këtyre akteve nga INUV-i, hetimi ka provuar gjithashtu se nga deklarimet e personave ndaj të cilëve tregojnë rrethana të dobishme për hetimin, rezulton se këto subjekte nuk kanë marrë dijeni, duke iu mohuar të drejtën e ankimit në rrugë administrative dhe në gjykatë. Në disa raste këto gjoba janë kthyer në titull ekzekutiv pa dijeninë e subjekteve ndaj të cilëve është proceduar”.
BW/d.i.
