Prokurori i Gjykatës Penale Ndërkombëtare për ish-Jugosllavinë do të apelojë vendimin e pafajësisë së ultranacionalistit serb Vojislav Sheshel, njoftoi ai duke cituar parregullsi në shkallë të gjerë në vendimin e gjyqtarëve.
“Zyra ime vendosi të apelojë aktin e gjykimit”, njoftoi prokurori Serge Brammertz në një deklaratë.
“Ne konsiderojmë se ka patur një dështim themelor nga shumica e gjyqtarëve në përmbushjen e funksionit të tyre gjyqësor”.
Në këndvështrimin e kundërshtarëve të tij, Vojislav Sheshel 61 vjeç simbolizon nacionalizmin serb në konfliktet në Kroaci (1991-95) dhe në Bosnje (1992-95), një formë frymëzimi nga fjalimet e tij të zjarrta. Konfliktet shënuan 20.000 të vdekur në Kroaci dhe 100.000 në Bosnje.
Ky ish-deputet serb i njohur për dhunën e tij verbale fitoi pafajësinë më 31 mars në mënyrë tërësisht befasuese nga nëntë akuza që rëndonin mbi të për krime kundër njerëzimit dhe krime lufte.