Prokurori i shtetit, Mario Maza, ka akuzuar rëndë Lionel Messin, pasi ky i fundit deklaroi gjatë ditës së djeshme se asnjëherë nuk ka qenë në dijeni se çfarë po nënshkruante
Lionel Messi dhe babai i tij Jorge akuzohen nga autoritetet tatimore në Spanjë se kanë shmangur taksat në periudhën 2007/2009 duke i shkaktuar shtetit një dëm prej 4,2 milionë eurosh.
Në rast se shpallen fajtor të dy rrezikojnë 22 muaj burg. Sipas akuzës, duke krijuar një seri shoqërish në parajsat fiskale Messi ka shmangur detyrimet tatimore nga të ardhurat që ka siguruar nga të drejtat e imazhit.
Lionel Mesi deklaroi dje para gjykatës se nuk ka marrë pjesë në asnjë vendim mashtrimi, pasi për gjithçka kanë vendosur prindërit e tij.
“Kam firmosur sepse besoj te babai im dhe nuk kam menduar kurrë se mund të më mashtronte. Nuk jam interesuar kurrë në këto çështje, ndaj nuk e dija që po shkelja ligjin. Nuk dija asgjë, thjesht mendoja të luaja futboll. Kisha shumë besim te babai dhe avokatët e mi”, kishte thënë Messi.
I menjëhershëm ka qenë reagimi i prokurorit të shteti, Mario Maza, i cili iu ka drejtuar Messit me fjalë të rënda.
Maza ka shkuar aq larg saqë e ka quajtur Messin “capo”, duke udhëhequr “një strukturë kriminale”, për të cilën lojtari nuk i ka ditur detajet, por e ka ditur rezultatin final: Të paguajë më kap taksa”.
Messi dhe babai i tij mund të jenë të papërvojë, por ata janë në gjendje që të kuptojnë se çfarë do të thotë të paguajnë tatime, madje këtë e din edhe një fëmijë 10 vjeçar”, ka thënë Maza. (express / r.a)
