Ish-kreu i SHISH, Fatos Klosi tha sot se atakimi i anëtarit të KLP, Bujar Sheshi si ish-bashkëpunëtor i Sigurimit të Shtetit, mund të jetë një ngatërresë.
Ai deklaroi se ka mjaft persona me gjeneralitete të njëjta, ndërsa shtoi se Sigurimi i Shtetit nuk rekrutonte bashkëpunëtorë nën moshën 18 vjeç.
“Unë kam një shok drejtor të Regjistrit të Gjendjes Civile dhe thotë ka shumë njerëz me identitete të njëjta, por dallimi është shumë i vogël.
Nuk është çudi që të jetë edhe ngatërresë. Nuk e kuptoj pse fut hundët politika pa mbaruar punë institucionet. Nuk besoj se ka pasur sigurimsa në moshën 17-vjeçe. Ka pasur një normë ligjore mbi 18 vjeç.
Raste të tilla mund të ketë pasur në mbrojtje të rinisë, të pastërtisë së figurës së rinisë. Nuk është puna për të dënuar.
Megjithatë regjimit i duheshin ca të rinj që thuhej kështu, thuhej ashtu, për të krijuar një opinion se çfarë bën rinia. Ky nëse ka qenë, ka pasur këto detyra. Unë nuk e njoh fare, por po diskutojmë në parim” – tha Klosi në Report TV.
/a.rada
