Ish-kryeministri Sali Berisha ka bërë një deklaratë të fortë lidhur me ndryshmet më të fundit që pritet të bëhen në Kodin e Famijes.
Në fjalën e tij gjatë “Foltores” në Kamzë, Berisha tha se ndryshimi i ligjit për birësim do të hapë rrugën për trafikimin e të miturve.
“Rama ka çuar në parlament ligjin për adoptimin e fëmijëve që do t’u hapë rrugë trafikimeve. S’kam asgjë kundër adoptimeve, i mbështes dhe i nderoj, por t’i besosh fëmijën atij që është krejt i vetëm në kushtet kur je shtet narkotrafiqesh e bën vetëm për t’i kthyer në objekt trafikimi. Save the Children ka publikuar studimin e tij, kur tregon se fëmijët këtu janë 2 herë më të kërcënuar se fëmijet në Kosovë dhe nuk po flas për vende të tjera. Rama do ta miratojë ligjin de facto të trafikut të fëmijëve,”-tha Berisha.
Po për çfarë ndryshimesh bëhen fjalë?
Për herë të parë parashikohet që mund të birësojë fëmijë një person i vetëm dhe personat që janë bashkëjetues, por vetëm sipas nenit 163 të Kodit të Familjes. Neni 163 parashikon që “Bashkëjetesa është një bashkim fakti midis burrit dhe gruas që jetojnë në çift, e karakterizuar nga një jetë e përbashkët, që paraqet një karakter stabiliteti dhe vazhdueshmërie”. Kufizimi sqarohet edhe në relacionin e projektligjit, duke nënvizuar ‘çiftet heteroseksuale’, pra që tërhiqen nga seksi i kundërt.
/b.h
