Të lexosh një libër, në kohën kur interneti të shfaq gjithçka shpejt dhe thjeshtë, i ngjan një misioni të vështirë. Kjo pasi, zhvillimi i teknologjisë ka bërë që fëmijët dhe moshat e reja të kalojnë një kohë të gjatë në internet dhe rrjete sociale. Megjithatë për nxënësit e shkollave 9-vjeçare libri mbetet ende një zgjedhje e kohës së lirë.
Projekti “Unë lexoj” është projekti më i ri i Ministrisë së Arsimit, që synon të afrojë nxënësit e shkollave parauniversitare me librin dhe leximin. Ky projekt synon të zgjerojë rrjetin e lexuesve, duke bashkëpunuar me nxënësit për librat që ata preferojnë të kenë pjesë të bibliotekës.
Në një intervistë për “News 24”, zëvendësministrja e Arsimit, Besa Shanini, sqaron se projekti do të aplikohet fillimisht në shkollat e Tiranës, për t’u shtrirë më tej në të gjithë vendin.
Shahini shprehet se për 2018 është gati një fond prej 50 mijë kopjesh që do të shpërndahen nëpër shkolla.
Nxënësit e shkollave 9-vjeçare dhe të mesme mund t’i dërgojnë titujt e librave të preferuar në linkun e ministrisë ose përmes bibliotekës së shkollës.
