Ministri i Transportit dhe Infrastrukturës Sokol Dervishaj ka inspektuar kantierin e punimeve për projektin “Kanalizimet e Tiranës së Madhe” ku tha se nga ky projekt që përmban risi teknologjike do i shërbejë jo pak por 342 mijë banorëve të Tiranës dhe përfundon në vitin 2018. Në inspektimin e kryer ishte i pranishëm edhe Presidenti i Agjensisë Japoneze të Bashkëpunimit (JICA), Shinichi Kitaoka, ku Dervishaj tha se pavarësisht se projekti ka pasur disa vonesa, e rëndësishme është që të shikohet përpara dhe të kapen afatet.
Ai vlerësoi punën e DPUK-së dhe kontraktorëve. Ministri deklaroi se deri në këtë fazë është implementuar në terren 40 % e projektit, por aspekti më i rëndësishëm nuk janë vetëm punimet inxhinjerike, por edhe teknologjia që do të përdoret për zbatueshmërinë dhe funksionimin e tij.
Dervishaj u ndal te disa aspekte të këtij projekti, duke thënë se ky jo vetëm është një projekt i jashtëzakonshëm nga pikëpamja teknologjike, por edhe nga shërbimi që i ofron Qytetit dhe banorëve.
“Në këtë kantier po punohet me një teknologji jashtëzakonisht të lartë japoneze, që ka parasysh jo vetëm zbatueshmërinë e projektit, por edhe komponentë të tjerë si komponenti mjedisor apo social për banorët e zonës, që të gjitha së bashku shkojnë në harmoni”, tha Dervishaj.
Ministri nënvizoi se nëse vazhdohet me këto ritme do të kapet afati i përfundimit të projektit që është viti 2018, dhe më pas do të mendohet për të avancuar me fazën e dytë, duke synuar përsëri bashkëpunimin me Qeverinë Japoneze.
