Ata që kanë makina luksoze, do të ndëshkohen me rëndë për shkeljen e rregullave të qarkullimit rrugor, se sa personat që kanë një makinë më modeste.
Kjo, për shkak të një projekti të Policisë Rrugore, të quajtur “Gjoba progressive”.
Ky projekt do të vihet në zbatim duke nisur nga viti që vjen dhe parashikon masa më të rënda ndëshkuese për makinat luksoze.
Ky fakt u bë i ditur nga ministri i Brendshëm, Saimir Tahiri, gjatë një pritjeje me gazetarët që ai zhvilloi disa ditë më parë, me rastin e festave të fundvitit, raporton Panorama.
Madje, Tahiri e ilustroi me një shembull konkret. “Një ‘Fiat Punto’ nuk mund të ndëshkohet me gjobë, vlera e së cilës të jetë e njëjtë me atë të një mercedesi ‘Regina’, për të njëjtën shkelje.
Pra, do jetë më e lartë për ‘Regina’- n”, tha Tahiri.
Kjo sipas tij, për vetë faktin se një person që posedon një makinë të shtrenjtë i ka edhe mundësitë për të riparuar ndonjë defekt, si mosfunksionimi i dritave, ndryshe nga ai që ka në pronësi një makinë që nuk kushton shumë dhe që defektet i ka më të shpeshta.
Duke nisur nga janari i vitit të ardhshëm, komisariatet e Qarkullimit në të gjithë vendin do të jenë të pajisura me një databazë të posaçme për automjetet me shkelje të përsëritura.
Kjo databazë nuk do të funksionojë më si zakonisht vetëm me targën e automjetit, por edhe tipin, vitin e prodhimit dhe llojet e shkeljeve më të shpeshta që ka kryer drejtuesi i këtyre makinave. Në varësi të të dhënave që do të përmbajë ky regjistër elektronik, do të vendoset se sa do të jetë vlera e gjobës së radhës për automjetet që kryejnë shkelje të qarkullimit rrugor.
Sipas shembullit që përmendi ministri i Brendshëm, Saimir Tahiri, pronari i një mjeti luksoz, që ka kushtuar shumë, ka më shumë mundësi financiare për të mirëmbajtur mjetin, deri në atë fazë sa një problem teknik mund të shkaktojë shkelje të Kodit Rrugor.
Nëse drejtuesi i një mjeti modest, i cili nuk e ka kaluar dot kontrollin teknik, do të marrë një paralajmërim me gjobë këshilluese, drejtuesi i një mjeti luksoz nuk do ta ketë këtë luks.
Madje, edhe gjoba pasardhëse, për të njëjtën shkelje, që vendoset pas asaj me vlerën “0 lekë”, do jetë më e lartë për drejtuesin e makinës së shtrenjtë.
