Investimet publike dhe shërbimet ndaj komunitetit, do të shënojnë një rritje të konsiderueshme gjatë vitit 2018, duke sjellë në një realitet të ri bashkëqeverisjen vendore në Shqipëri.
Buxheti i vitit të ardhshëm do të adresojë më shumë fonde financiare për njësitë e qeverisjes vendore, që do të synojnë forcimin e decentralizimit fiskal, konsolidimin fiskal dhe financiar dhe orjentimin e qeverisjes vendore drejt zhvillimit të qëndrueshëm.
Gjithashtu vitin që vjen, bashkitë do të përfitojnë edhe nga ndarja e të ardhurave nga Tatimi mbi të Ardhurat Personale.
“Në funksion të këtij objektivi transferta e pakushtëzuar së bashku me taksat e veta dhe të ndara do jetë rreth 3 miliardë lekë më e lartë se ajo e vitit 2017 dhe do shkojë tërësisht në rritjen e portofolit të investimeve publike vendore dhe shlyerjen e detyrimeve të prapambetura për njësitë e vetëqeverisjes vendore”, citon relacioni i projektbuxhetit 2018.
Konsolidimi i Reformës Territoriale Administrative që përshiu qeverisjen vendore në Shqipëri, me mbështetjen e BE-s synon forcimin e kapaciteteve institucionale të administratave vendore, përmirësimin e ofrimin e shërbimeve dhe mjedisit për angazhimin aktiv të qytetarëve, të cilat së bashku synojnë të arrijnë një qeverisje të mirë vendore.
