Kryetari i Partisë Demokratike Lulzim Basha priti në një takim ambasadoren e Bashkimit evropian në Tiranë Romana Vlahutin, e cila i dorëzoi kryeopozitarit raportin e progresit të Shqipërisë. Pas takimit, kreu i selisë blu dha një deklaratë për mediat, gjatë së cilës fajësoi Ramën për mungesën e hapjes së bisedimeve të anëtarësimit të Shqipërisë në Bashkimin Europian.
“Fakti është që përgjegjësia për mos-hapjen e negociatave është e atij që më 21 qershor pamundësoi zgjedhje demokratike duke shkatërruar procesin zgjedhor. Përgjegjësia është e njëriut që edhe sot e kësaj dite zvarrit pafundësisht konsensusin për dekriminalizimin duke u bërë mburojë e njerëzve që promovoi në Parlament dhe pushtetin vendor, individë vrasës, të lidhur me drogën dhe prostitucionin. Mos-hapja e negociatave është përgjegjësi e njeriut që nga njëra anë ngre gishtin tek gjyqësori, por nga ana tjetër refuzon të emërojë gjyqtarët në Gjykatën e Lartë sepse përdor si mazha gjyqtarët me mandat të skaduar”, tha Basha.
Sipas Bashës, më tepër se politik, dëmi që po i shkakton kjo qeveri vendit, është edhe ekonomik. Ai ripërsëriti akuzat e opozitës për disa emra të kabinetit qeveritar si Ilir Beqajn, që opozita e akuzon për korrupsion me tenderat në shëndetësi, Damian Gjiknurin për marrëveshjen me CEZ, Saimir Tahirin, që e akuzon për lidhje me trafikun e drogës dhe Arben Ahmetajn, për tender korruptiv për landfillin e Elbasanit.
“Nuk ka asgjë të përbashkët ëndrra jonë europiane me këtë qeveri. Mosreflektimi i Edi Ramës nuk është më risi për shqiptarët. Shqipëria është i vetmi vend me statusin kandidat pa negociata të hapura”, shtoi Basha.
Kreu i opozitës ripërsëriti thirrjen për mosbindje civile.
“Mosbvindje civile dhe të marrim në dorë fatet e vendit si europianë sepse kjo qeveri është në muzgun e saj dhe përpara e pret një natë e errët e zullumit. Koha ka ardhur që të reagojmë të gjithë së bashku”, vijoi Basha.
