Fran Frrokaj, kryebashkiaku që u arrestua sot, pas akuzave për tjetërsim prone në Lezhë, ka mbajtur disa poste publike. Për tre mandate rresht ai është zgjedhur kryetar i Komunës së Shënkollit, ndërsa në 2015 qytetarët i besuan drejtimin e bashkisë së Lezhës.
Posti si kryebashkiak nuk ka qenë i vetmi post publik që ka mbajtur Frrokaj.
Kryebashkiaku i Lezhës fillimisht është zgjedhur kryetar komune.
Këtë post Frrokaj e ka mbajtur për tre mandate me radhë, nga viti 2003 deri në zgjedhjet lokale të 2015-ës, kur qytetarët e Lezhës i votëbesuan drejtimin e bashkisë.
I diplomuar në Fakultetin e Inxhinierisë mekanike, Universiteti i Tiranës, Frrokaj ka mbaruar edhe Fakultetin juridik, Universiteti ‘L.Gurakuqi’, Shkodër.
Për disa vite ka punuar si inxhinier specialist tek Drejtoria e Rrugëve, Lezhë.
Për katër vite 1995-1999, Frrokaj ka punuar Oficer i Policisë rrugore në Komisariatin e Policisë Mirditë dhe për një vit ka qenë shef i policisë rrugore në Drejtorinë e Policisë Shkodër.
Kryebashkiaku i Lezhës ka mbajtur edhe disa poste të tjera publike.
Ai ka shërbyer si përgjegjës i Sektorit të Regjistrimit të Mjeteve pranë Drejtorisë Rajonale të Shërbimit të Transportit Rrugor në Lezhë dhe Tiranë në vitet 2000-2003.
I pari i Lezhës, që sot është në kushtet e arrestit, ka një aktivitet të gjatë partiak dhe që prej vitit 2014 nënkryetar i Partisë Demokratike në degën e Lezhës dhe anëtar i Kryesisë së Partisë Demokratike.
Është i martuar dhe ka dy fëmijë.
