“Rastësia dhe fati i keq nuk kanë të bëjnë me serinë e dëmtimeve që ka goditur Bayernin. Varen nga gabimet e stafit dhe të atyre që përgatisin stërvitjen”. Kështu thotë në një intervistë me agjencinë SID profesori Lars Lienhard, një nga ekspertët më të mirë në Europë në studimin e sistemit nervor dhe marrëdhënien e tij me sportin. Një sinjal alarmi që Pep Guardiola e sidomos pasardhësi i tij, Carlo Ancelotti, duhet ta kenë parasysh.
Historia është e njohur. Në muajt e fundit, Bayern është goditur nga një seri problemesh fizike që e ka lënë pothuajse pa mbrojtje. Jashtë Benatia, Boateng e Javi Martinez, por edhe i sapokthyeri Holger Badstuber, i cili theu kaviljen pas disa dëmtimeve në gju. Duke kaluar në sulm, listës i shtohet Ribery, pothuajse një vit jashtë, në fillim nga një dëmtim në kofshë e pastaj kavilja. Dëmtime dhe ridëmtime, në Bavari tani është kthyer në një normalitet të trishtueshëm. Dhe të martën e ardhshme, kundër Juventusit në Champions League, Guardiola duhet të formojë qendrën e mbrojtjes me Alabën, mbrojtës i majtë, dhe Kimmich, mesfushor.
Lienhard, i cili ndihmoi Gjermaninë me përgatitjen fizike të shkëlqyer në botëror, nuk ka dyshime: “Kur thyhet diçka apo përdridhet një muskul, nuk ka kuptim të fajësosh rastësinë. Do të thotë që janë bërë gabime në dhënien e ngarkesës në stërvitje dhe në kontrollin e lëvizjeve. E kotë t’ua vësh fajin doktorëve, faktori kyç janë strukturat e rehabilitimit dhe përgatitja fizike pas dëmtimeve. Po marr si shembull Ribery e Badstuber, çdo lojtar që vjen nga një ndalesë e gjatë tenton të mbrojë atë pjesë të trupit me një refleks të pavullnetshëm. Ndaj nevojitet të punohet me pjesën neurologjike po aq sa edhe me atë atletike, ndryshe ka rrezik”.
Pep është betuar se nuk ka kërkuar kurrë rikthimin e shpejtë të lojtarëve të dëmtuar. Por gjendja është e rëndë dhe opinioni i profesor Lienhard nuk mund të injorohet lehtë.
