Ballkani është pjesë e Evropës. Është ky apeli që bëri sot për Shqipërinë dhe vendet e Ballkanit, politikani i njohur italian, ekonomisti, akademiku dhe Ish-Presidenti i KE, Romano Prodi.
Prodi foli për Shqipërinë me shumë dashamirësi, duke e cilësuar si një nga vendet që i ka mbetur në zemër.
‘Shqipëria është një mrekulli e vertetë, duke pasur parasysh se sa vend i izoluar ka qënë. Shqipëria përpiqet maksimalisht. Pavaresisht pengesave, Shqipëria jeton në limitet që ajo ka. Shqipëria është një vend që më ka mbetur në zemër”, tha Prodi.
Idenë se Shqipëria është zgjedhja e duhur për takimin e organizuar për 3 ditë rresht, e përforcoi edhe Kryetari i Këshillit Papnor për Familjen në selinë e Shenjtë, Vincenzo Paglia.
“Më duhet të them se më pëlqeu zgjedhja e Papa Françesku për të nisur vizitën e tij të parë në Evropë, në Shqipëri. Në fakt, Shqipëria nuk ndodhet ekzaktësisht në Evropë, por Evropa duhet të ndihmojë vende të tilla si Shqipëria.
Ne jemi në Tiranë, jo sepse ka hotelet apo shërbimet më të mira nga e gjitha bota, por sepse ne duam të rindërtojmë Evropën nga periferia, në duam që Evropa të ringrihet nga Shqipëria, sepse në Shqipëri ka shpresë. Në Shqipëri ka ëndrra, shqiptarët ëndërrojnë Evropën dhe ne kemi nevojë për ëndrra të tilla”, nënvizoi Arqipeshkëv Vincenzo Paglia.
Nga ky vend, tha ai, nga vendi i shqiponjave, Evropa ka një sens të veçantë, sepse Evropa ka nevojë për fluturim.
