Një prej vaksinave kandidate kryesore për Covid-19 ka rezultuar se është 90 për qind efektive, duke shënuar një përparim të madh në luftën globale për të frenuar përhapjen e këtij virusi vdekjeprurës.
“Pfizer” dhe “BioNTech” publikuan sot rezultatin surprizues, ku sipas tyre, nga provat ka rezultuar se 9 në 10 që morën vaksinën janë të mbrojtur nga koronavirusi.
Kompania amerikane “Pfizer” dhe ajo gjermane “BioNTech” thanë se: “kjo është një ditë e madhe për shkencën dhe njerëzimin”.
“Ne duam të veprojmë në një mënyrë evropiane dhe jo duke ndjekur një vijë kombëtare”. Kështu u shpreh ministri gjerman i Shëndetësisë, Jens Spahn në një konferencë shtypi në Berlin, duke komentuar lajmet e publikimit të të dhënave të “Biontech”.
“Ne duhet të dalim me një vaksinë vullnetare,” përsëriti gjithashtu Spahn. “Kur u pyetëm se cilat sasi dozash dhe kur do të jenë në dispozicion, ne nuk mund të përgjigjemi akoma,” shtoi ai.
Bursa është rritur ndërkohë, pas lajmit se një vaksinë anti-Covid do të mbërrijë së shpejti në fund të këtij viti, ku raporti i efektivitetit është 90%. “Lajm i shkëlqyeshëm! ”, shkroi Donald Trump në Twitter duke komentuar njoftimin e “Pfizer”.
/a.r
