Rreth orës 18.20, ka përfunduar procesi i numërimit të votave për bashkinë Dibër. Policia ka shpërndarë një deklaratë rreth ecurisë së procesit, ku ka ndodhur edhe një incident. Ja njoftimi i policisë për ecurinë:
Gjatë procesit të numërimit të votave është kërkuar vetëm njëherë ndërhyrja e Policisë, ku rreth orës 12:25, me Vendim nr 1 të KZAZ-së, shërbimet e policë kanë ndërhyrë në ambientet e brendshme të KZAZ-së, për nxjerrjen jashtë të personave të pa autorizuar. Pas verifikimeve të kryera, policia ka nxjerrë jashtë ambienteve disa persona që ishin të pa paisur me autorizim.
Në orën 12:45, po me Vendim nr 2 të KZAZ-së, policia është larguar nga ambientet e brendshme të numërimit të votave.
Shërbimet e policisë që janë të angazhuara në ruajtien fizike të godinës së KZAZ-së, që prej orës 18.00 të datës 09.09.2016 e deri në këto momente nuk kanë evidentuar asnjë problem.
Policia e Dibrës gjatë gjithë fazave të procesit zgjedhor ka qenë e angazhuar maksimalisht për të përmbushur detyrat e përcaktuara në planet e masave të hartuara për këtë qëllim.
Gjatë tre fazave të procesit shërbimet e policisë kanë zbatuar me përpikmëri detyrat e përcaktuara në Kodin Zgjedhor dhe në ligjin për Policinë e Shtetit.
Për garantimin e rendit dhe sigurisë në këtë proces u angazhuan rreth 181 forca policore të Policisë Dibër dhe rreth 20 automjete policie.
Në të tria fazat e procesit janë evidentuar 4 incidente që s’kanë cënuar procesin zgjedhor, të cilat janë trajtuar me profesionalizëm nga ana jonë, duke referuar materialet në Prokurori për personat përgjegjës.
Nga ana e Policisë së Dibrës është siguruar rendi e siguria në rreth 50 takime elektorale të zhvilluara nga dy subjektet politike.
Janë mbuluar me punonjës policie të gjitha objekt zgjedhore, si dhe është bërë shoqërimi i materialeve zgjedhore.
Policia e Dibrës vijon shërbimin në KZAZ deri në largimin për në KQZ të materialeve zgjedhore.
Njëkohësisht janë marrë të gjitha masat për të garantuar rendin dhe sigurinë gjatë festimeve që po kryhen në qytetin e Peshkopisë./a.m.
