Instituti i Sigurimeve Shoqërore ka sqaruar procedurat për përftimin e pensioneve dhe kompensimit të energjisë elektrike. Duke iu përgjigjur pyetjeve të qytetarëve ISSH shpjegon edhe rastin e përftimeve në fshat.
Kam punuar 3 vite kur isha në moshën 20 vjeç dhe nuk më kanë paguar sigurime shoqërore. Dua që t’i paguaj tani ato vite me sigurim vullnetar. A mund të më sqaroni ju lutem se sa është pagesa dhe si funksionon?
Përsa pyesni, ju sqaroj se Instituti i Sigurimeve Shoqërore i ofron mundësinë të gjithë shtetasve shqiptarë kudo që ndodhen, brenda territorit të Republikës së Shqipërisë dhe jashtë saj që për të plotësuar periudhat e pambuluara kontributive, duke u siguruar vullnetarisht nëpërmjet sigurimit vullnetar. Kuota mujore që duhet të paguani për të bërë sigurimi vullnetar, si për vitin korrent (vitin 2017), ashtu dhe për vitet e kaluara që ju i keni të paplotësuara me kontribute është 5 184 lekë në muaj ose 62 208 lekë në vit. Nëse ju vendosni të bëni sigurimi vullnetar, duhet të paraqiteni në Agjencinë Lokale të Sigurimeve Shoqërore pranë vendbanimit tuaj, me fotokopjen e kartës së identitetit dhe librezën e punës apo librezë kontributesh, nëse keni. Inspektori për sigurimin vullnetar në ALSSH do të jetë në shërbimin tuaj në çdo kohë që ju do të paraqiteni.
Jam përfitues i pensionit të reduktuar. Kërkoj të di nëse do të më rillogaritet masa e pensionit në momentin që do të mbush moshën 65 vjeç, për pension të plotë pleqërie?
Mbështetur në kërkesën tuaj, Drejtoria Rajonale e Sigurimeve Shoqërore Tiranë, ju ka caktuar pension të reduktuar pleqërie, bazuar në nenin 31/1, të Ligjit nr. 7703, datë 11.05.1993 “Për sigurimet shoqërore në Republikën e Shqipërisë”, të ndryshuar, në datën 01.11.2014, me 35 vite periudhë sigurimi. Në bazë të këtij neni, pensioni i reduktuar është pjesë e pensionit të plotë dhe mbetet i reduktuar gjatë gjithë kohës së përfitimit. Në momentin e plotësimit të moshës nuk do të ketë rillogaritje mase pensioni, përveçse kjo masë do të përfitojë të gjitha rritjet që bëhen me Vendim të Këshillit të Ministrave “Për rritjen e pensioneve”.
Jemi dy pensionistë nga fshati Synej, Kavajë, a na takon kompensimi për energjinë elektrike?
Në Vendimin e Këshillit të Ministrave nr.495, datë 29.06.2016 “Për disa ndryshime në Vendimin nr. 8, datë 14.01.2015, të Këshillit të Ministrave “Për mbrojtjen e shtresave në nevojë, për efekt të heqjes së fashës së konsumit të energjisë elektrike deri në 300 KËH në muaj”, është përcaktuar se: përfitojnë kompensimin nga rritja e çmimit të energjisë elektrike në masën 648 lekë në muaj, kryefamiljarët që përfitojnë pension pleqërie shtetëror ose pension social, por që janë me banim në fshat, kur familja përbëhet vetëm nga pensionistët”. Pra, nëse ju përfitoni pension pleqërie shtetëror, jetoni në fshat dhe jeni vetëm, ju përfitoni kompensimin për energjinë elektrike.
Ata persona që nuk jetojnë në Shqipëri dhe janë të vetëpunësuar në shtetin ku jetojnë aktualisht,a mund të bëjnë sigurim vullnetar për të ardhura më të larta?
Përshëndetje, Nëse ju vazhdoni të keni nënshtetësinë shqiptare dhe keni vite pune në Shqipëri, ju mund të bëni sigurim vullnetar për vitet e munguara. Periudha minimale e viteve të punës për një pension minimal është 15 vite. Ndërsa nëse ju nuk e keni nënshtetësinë shqiptare, mund të bëni sigurim vullnetar për vitet deri në momentin që keni pasur nënshtetësinë shqiptare. Pagesa mujore për sigurim vullnetar është 5 184 lekë.
Jam e interesuar të di nëse gruaja mund t’i dhurojë (kalojë) burrit vite sigurimi nga vitet e siguruara të saj.
Në lidhje me pyetjen tuaj, sqarojmë se: Mbështetur në Ligjin nr. 7703, datë 11.05.1993 “Për sigurimet shoqërore në RSH”, të ndryshuar, çdo person punon dhe sigurohet për veten e tij dhe nuk mund të dhurojë periudha sigurimi as për bashkëshortin dhe as për bashkëshorten/shqiptarja
