Të gjithë familjarët që banojnë në pallatet e ndërtuara në shkelje të lejes, duke bërë shtesa apo edhe kate, do të kenë në duar hipotekën e banesës. Këtë mesazh dha dje në takimin me banorët e Njësisë 7 ministrja e Zhvillimit Urban, Eglantina Gjermeni, e shoqëruar nga kreu i ALUIZNI-t, Artan Lame.
“Pa diskutim, të gjitha familjet, në të gjithë vendin, që kanë derdhur djersën e tyre për blerjen e një shtëpie, në pallate që preken nga VKM-ja që miratuam në muajin janar, do të marrin lejen e legalizimit”. Por, ky proces, sipas ministres, kërkon medoemos bashkëpunimin e banorëve.“Na duhet t’i ndjekim rast pas rasti për t’i adresuar për shkak të kompleksitetit që kanë. Ndihma dhe bashkëpunimi juaj është shumë i rëndësishëm në identifikimin e problemeve dhe hartimin e dokumentacionit të nevojshëm që, më pas, do të ndiqet nga ALUIZNI”, vuri në dukje Gjermeni. Kjo bisedë konsultuese vjen dy muaj pas vendimit të Këshillit të Ministrave, që i hap rrugë hipotekimit të rreth 1320 pallateve në të gjithë vendin.
PROCEDURA
Në bisedën me banorët e Njësisë 7, kreu i ALUIZNI-t, Artan Lame, u ndal në procedurën që do të ndiqet për finalizimin e hipotekimit të banesave të më shumë se 30 mijë kryefamiljarëve. Procesi nis me investitorët, të cilët njoftohen nga ALUIZNI dhe do të kenë 30 ditë afat për të përmbushur detyrimet ligjore.Në rast se ai nuk përgjigjet, përgjegjësia kalon te familjarët apo blerësit e hyrjeve. Këta të fundit duhet të depozitojnë pranë zyrave të agjencisë kontratën e shitblerjes që kanë firmosur me firmat e ndërtimit, për të vijuar procedurën e legalizimit. Sakaq, Artan Lame thekson se e gjithë kjo procedurë do të bëhet falas dhe do të ndiqet nga agjencia. Ndaj apeloi qytetarët të mos pranojnë kurrfarë shërbimi sekser.“Ju lutem, mos paguani dhe mos merrni parasysh njerëz që premtojnë legalizim në këmbim të pagesës”. Sipas të dhënave nga kreu i ALUIZNIt, vetëm në Njësinë 7 janë bërë 3900 vetëdeklarime, ndërsa më shumë se gjysma e tyre, rreth 2050, kanë përfituar legalizimin. Sakaq, shmangja nga ana e firmave ndërtuese nuk fshin detyrimet e tyre financiare, si pagesa e taksës së infrastrukturës për objektin e ndërtuar. Pra, vendimi i qeverisë nuk mban peng qytetarët që duan të hipotekojnë banesat për shkak të mosshlyerjes së detyrimit financiar të firmës ndërtues. Institucioneve shtetërore u lind detyrimi për ndjekjen e shlyerjes së detyrimeve fiskale të taksës së infrastrukturës nga këta ndërtues apo investitorë.
ma.me
