Policia e Shtetit ka proceduar penalisht 24-vjeçaren Marsela Toshi, nënën e dy fëmijëve të mitur që u mbytën nga babai në Korçë.
Pas kthimit nga Greqia, e reja u shoqërua nga policia në pikën kufitare të Kapshticës, e më pas dha dëhsminë e saj për konfliktet me bashkëshortin.
Më pas, ajo u procedua në gjendje të lirë nga uniformat blu.
24-vjeçarja akuzohet për “braktisje të fëmijëve të mitur”.
NJoftimi i policisë:
“Më datë 05.12.2016, Specialistët e Seksioni për Krimet në Komisariatin e Policisë Korçë, filluan procedimin penal në gjendje të lirë ndaj shtetases: M.T(B), 24 vjeçe, banuese në Korçë.
Procedimi ndaj saj ka filluar pasi, kjo shtetase ka braktisur dy fëmijët e saj të mitur dhe më pas është larguar për në shtetin Grek, konkretisht shtetasit J.T dhe V.T të moshave 7 dhe 4 vjeç, trupat e të cilëve u gjetën të pajetë, së bashku me trupin e bashkëshortit të kësaj shtetaseje më datë 05.12.2016 në banesën e tyre, në lagjen nr 4 Korçë. Materialet i kaluan Prokurorisë të Rrethit Gjyqësor Korçë për veprën penale: “Braktisja e fëmijëve të mitur” parashikuar nga neni 124 i Kodi Penal”, thuhet në njoftimin e policisë.
Edhe pse procedimi penal është në gjendje të lirë, Marsela do të mbahet e izoluar, pasi sot zhvillohet ceremonia mortore e burrit dhe dy fëmijëve të saj. Familjarët e bashkëshortit nuk pranojnë që Marsela të jetë e pranishme në ceremoni.
24-vjeçarja do të mbahet e izoluar deri në përfundim të ceremonisë, për të evituar ndonjë konflikt me familjarët.
/a.m.
