Nga Mero Baze

Sali Berisha ka arritur sot një fitore bindëse kundër SHBA dhe mbështetësve të  saj të trembur brenda Partisë Demokratike. Në kulmin e një fushate publike të SHBA për të distancuar PD nga Berisha dhe paralajmërimeve të diplomatëve amerikanë se do të bojkotojnë Kuvendin, nëse shkon Berisha, ai detyroi sot PD-në të ngrihet në këmbë dhe të duartrokasë atë kundër vendimit të SHBA.

Hyrja  e tij e inskenuar në Këshillin Kombëtar, e shoqëruar me duartrokitje histerike, që linin në hije Lulzim Bashën, ishte një përgjigje e llogaritur kundër vendimit të SHBA për ta futur në listën e zezë.

Kuvendi i sotëm i PD vlente qoftë dhe vetëm për këtë.

Ai i hoqi Lulzim Bashës makthin për të pritur deri në shtator. Ai i tregoi sot, se PD është në gjunjë para Sali Berishës dhe kushdo që tenton të dalë nga radhët, nuk ka më punë aty.

Pas kësaj, i gjithë Kuvendi ishte një farsë. Edhe fjalimi më kritik i Kuvendit, ai i Mark Markut, i cili po përsërit ato që kemi thënë këto dhjetë vite për PD-në, e shmangte temën e nxehtë të Sali Berishës nga fjalimi.

Tema e sotme e Kuvendit në fakt do të duhej të ishte debati për të ardhmen e PD dhe e ardhmja e PD varet nga qëndrimi që ajo do mbajë ndaj Sali Berishës dhe familjes së tij të damkosur si kriminale.

Fakti që dhe më kritiku në Kuvend nuk guxoi ta zërë me gojë këtë histori, tregon qartë se Partia Demokratike është një grup talebanësh, që tani betejë kryesore kanë betejën me SHBA, pro Sali Berishës.

Dhe kjo do të thotë shumë për të ardhmen e PD.

PD nuk vjen në pushtet se u organizua më mirë, apo se Gaz Bardhi mund të ketë bythë të mbrojë votat në Elbasan.

PD vjen në pushtet kur të bëhet një forcë pro-perëndimore, të jetë në unison me aleatët tanë strategjikë, SHBA, dhe krijojë sigurinë e një force politike që do sjellë progres në Shqipëri.

PD e Kuvendit të sotëm dëshmoi veten si një forcë politike talebane, që është gati të kthehet në kamikaze kundër SHBA, për të qëndruar besnike e Berishës.

Kush nuk ka fuqi të ndajë këtë histori në PD, nuk e ndihmon dot as PD, as veten e vet. Çdokush që në PD bën sikur kritikon organizimin e partisë, shitjen apo blerjen e votave, funksionimin apo jo të strukturave, është duke gënjyer veten.

PD është e vdekur me një të vdekur dhe të pakallur brenda saj, dhe në krye të saj. Pa nxjerrë atë arkivol nga shtëpia, dyert e asaj partie nuk hapen më kurrë, se mbysin çdokënd që do të hyjë brenda.

Sot PD ka duartrokitur betejën e Sali Berishën me SHBA dhe askush nuk pati guximin të ngrihej e t’u thoshte “Boll!”

Sali Berisha u ngrit nga varri për të shkuar së sallën e Kuvendit vetëm që ta ndante këtë histori, nëse ata ishin me të, apo me SHBA.

Ishte e qartë që ishin me Sali Berishën deri në vdekje. Rrugë e mbarë dhe me krahë të lehta! Nuk do mundoheni shumë, se nuk keni dhe shumë rrugë deri tek vdekja. TEMA