Në 25 vende të Evropës janë ndier pasojat e devijimeve në rrjetin energjetik të Kosovës
Mosmarrëveshjet mes Kosovës dhe Serbisë në fushën e energjisë po u shkaktojnë probleme edhe shteteve evropiane.
Një devijim i frekuencës së energjisë, si pasojë e moskoordinimit mes Kosovës dhe Serbisë, i ka shkaktuar 113 gigavate energji humbje Sistemit të Energjisë së Evropës Kontinentale, ka njoftuar Rrjeti Evropian i Operatorëve të Sistemit të Transmisionit (ENTSO-E), shkruan Koha Ditore.
Devijimi i frekuencës së energjisë, sipas një deklarate të ENTSO-E, vjen për shkak se që nga mesi i janarit Kosova është duke shpenzuar më shumë energji elektrike sesa që aktualisht prodhon. Ndërkaq thuhet se Serbia ka dështuar ta balancojë rrjetin energjetik të Kosovës për të cilën aktualisht është përgjegjëse. (b.an)
