Nga Armando Meta/
Lulzim Basha po përjeton një vjeshtë të vështirë brenda dhe jashtë PD-së. Dhe kur i duhet reacionalitet për t’u përballur me sfidat që paralajmërojnë një dimër të vështirë për të sidomos brenda PD, ai shfaqet jo vetëm natyrë emocionale, por edhe teatrale. Ky binom duket se përbën edhe profilin e tij, ku nga njëra anë nuk arrin dot të gjykojë në mënyrë të ftohtë dhe të marrë vendime të mëncura, dhe nga ana tjetër përpiqet të aktrojë për të mbuluar difektet e tij si politikan, duke aktruar shumë dobët.
“Spektakli” i dhuruar prej tij në seancën e sotme parlamentare, duke u shfaqur si ‘lider i fortë’, që mund të kthejë përmbys edhe Kuvendin nëse ai dëshëron, ishte dhe vijon të jetë një shfaqe tejet butaforike, aspak e denjë për një lider politik dhe aq më pak të përçojë mesazhe pozitiviteti tek zgjedhësit. Ky teatralitet nuk mbërrin dot madje as tek fanatikët e PD. Basha thënë troç nuk arrin dot të lerë emocionet jashtë vendimarrjes politike. Për pasojë të gjitha ato që bën, më pas i kthehen në bumerang, ku nuk arrin ta shpëtojë askush. Kjo u pa edhe gjatë periudhës së çadrës, ku vendimarrja e tij personale e futi PD në rrugë pa krye, e armiqësoi me të gjithë komunitetin ndërkombëtar dhe natyrisht u kthye në një bezdi edhe për vetë qytetarët e Tiranës me bllokimin e bulevardit për muaj me rradhë. Nuk po marrim shumë në analizë edhe ato çfarë thoshte në çadër duke filluar nga ‘thyrja e xhamave’ e kërcënimet për përmbysje, e deri tek sulmet personale ndaj zyrtarëve më të lartë të Brkuselit e Uashingtonit, duke mos arritur të përmbajë emocionet se nuk po e përfillte askush, tek qëllimet e PD për të pasur një pozicion më të favorshëm elektoral.
Edhe ajo çfarë po bën tani në Kuvend nuk ka pikë sensi, por thjeshtë ashtu i ka ‘shkrepur në kokë’, njësoj si me çadrën. Ai po kërkon me forcë diçka për të cilën nuk ka vota. është shumë e thjeshtë. Nga nana tjetër shkel hapur rregulloren e funksionimit të Kuvendit duke u përpjekur të na dëshmojë se ka këllqe deri edhe ta bllokojë pavarësisht formave që zgjedh. Sjellje tipike të një kryeneçi dhe pa asnjë finesë politike. Por përtej zallamahisë që ai kërkon të imponojë në Kuvend, në sfond problemi nuk është Kuvendi, por problemet e brëndëshme që ai ka në PD, të cilat çdo ditë e më shumë ia kërcënojnë postin e kryetarit. Ajo që bën në Kuvend është thjeshtë të tregojë se është ‘lider i fortë’. Gjithësesi është teatralitet. PD kurrë s’ka qenë më e përçarë në të gjithë historinë e saj politike sesa është sot. Grupimet në këtë parti tashmë janë profilizuar dhe në përbërje të kundërshtarëve të Bashës ka figura më me shumë peshë se pjesa që i rri përballë foltores kur ai flet në Kuvend. Nëse flet për zgjedhje, Basha duhet të tregojë sëpaku se është lider legjitim brenda partisë që ai drejton. Kundërshtarët e tij e akuzojnë se postin që ai mban e mori përmes manipulimit të të gjithë procesit zgjedhor në PD. Ndaj deklamimet e tij në Kuvend për reformë zgjedhore jo vetëm janë të pabesueshme, por dhe joserioze. Problemet në PD nuk zgjidhen me gjeste teatraliteti në Kuvend. Përpara se të ruaj foltoren e Kuvendit, ai duhet të ruaj foltoren në PD.
