Nën drejtimin e ministres së Zhvillimit Ekonomik, Turizmit, Tregtisë dhe Sipërmarrjes, Milva Ekonomi, u mblodh të mërkurën task-forca e menaxhimit të sezonit turistik veror, ku u diskutuan rreth problemeve që mund të paraqiten gjatë sezonit turistik.
Ministrja Ekonomi prezantoi disa nga masat e marra paraprakisht në bashkëpunim me ministri dhe institucione të ndryshme për mbarëvajtjen e sezonit turistik. Ekonomi informoi se janë marrë masa për hapjen e zyrave të informimit që do të organizohen në gjithë pikat turistike të vendit.
Sipas saj, task-forcë synon rritjen e cilësisë së shërbimit gjatë këtij sezoni dhe rritjen e mundësisë që sektori i turizmit të shërbejë si një nxitës i rëndësishëm i zhvillimit ekonomik të vendit.
Ekonomi i bëri thirrje njësive administrative që janë destinacione turistike bregdetare të bëjnë kërkesa për financim projektesh infrastrukture pranë Fondit të Zhvillimit Rajonal për të plotësuar nevojat e tyre.
Duke folur për statistikat, ministrja Ekonomi tha se në vitin 2015 numri i turistëve u rrit për shkak të llojit të produktit turistik që u ofrua dhe kjo falë sipërmarrjes private. Sipas saj, kjo rritje e nurmit të turistëve solli edhe rritje të të ardhurave.
Ministritë e linjës dhe institucione të tjera të varësisë ngritën disa shqetësime që lidhen me projektet infrastrukturore të papërfunduara, furnizmin me energji, si dhe dëmtimin e faunës.
Task- forca është krijuar me urdhërin e Kryeministrit “Për miratimin e planit të masave përgatitore për sezonin turistik veror për vitin 2016 dhe për krijimin e task-forcës së menaxhimit të sezonit turistik veror”.
Në përbërje të task-forcës janë kreu i AKT, AKB, përfaqësues nga ministria e Transportit dhe Infrastrukturës, Kulturës, Financave, Shëndetësisë, Çështjeve Vendore, kreu i DPT-së, AKU, ARRSH-së, zv/drejtori i Policisë së Shtetit për Sigurinë Publike; zv/drejtori i Policisë së Shtetit për Kufirin dhe Migracionin, kreu i i Inspektoratit Shtetëror të Mjedisit, Ujërave dhe Pyjeve, etj