Një miliard e njëqind milionë lekë të ardhura nga privatizimi i shoqërisë “INSIG” do të shkojnë për Ministrinë e Transportit dhe Infrastrukturës. Qeveria vendosi në mbledhjen e sotme, shpërndarjen e pjesshme të të ardhurave nga privatizimi i “INSIG”-ut, aksionet e së cilës u blenë nga “EUROSIG” për shumën totale 2 miliardë e 222 milionë lekë.
Në mbështetje të nenit 100 të Kushtetutës, të ligjit nr.9936, datë 26.6.2008, “Për menaxhimin e sistemit buxhetor në Republikën e Shqipërisë”, të ndryshuar, dhe të nenit 9, të ligjit nr.147/2015, “Për buxhetin e vitit 2016”, me propozimin e ministrit të Financave, Këshilli i Ministrave vendosi:
“Kufiri i shpenzimeve kapitale dhe niveli i deficitit buxhetor, miratuar në ligjin nr.147/2015, “Për buxhetin e vitit 2016”, shtohet me 1 100 000 000 (një miliard e njëqind milionë) lekë nga të ardhurat e realizuara nga privatizimi i shoqërisë “INSIG”, sh.a.
Fondi prej 1 100 000 000 (një miliard e njëqind milionë) lekësh i shtohet kufirit të shpenzimeve kapitale të Ministrisë së Transportit dhe Infrastrukturës, në programin “Transporti rrugor”, për projektin “Ndërtim rruge: Unaza e Re e Tiranës (segmenti Komuna e Parisit – Rruga e Kavajës) loti 1”, thuhet në njoftimin e Këshillit të Ministrave. Për zbatimin e këtij vendimi ngarkohen Ministria e Financave dhe Ministria e Transportit dhe Infrastrukturës.
ma.me
