Dekorimi i Presidentit Bill Clinton zhvillohet në Bulevardin Dëshmorët e Kombit, ceremoni në të cilën marrin pjesë të ftuar të posacëm, por edhe qytetarë që dëshirojnë të ndjekin nga afër vizitën historike të Presidentit të 42-të të Amerikës.
Karriget e të ftuarve të nderit janë rezervuar për shtetarët më të lartë, diplomatë dhe figura publike.
Qeveria ju ka dërguar ftesë edhe grupeve parlamentare të opozitës.
Disa deputetë të saj konfirmuan me kënaqësi pjesëmarrjen në nderimin e një nga figurave botërore me ndikimin më të madh për kombin tonë.
Por PD-ja zyrtare, do të reflektojë edhe në këtë ditë të rëndësishme, krizën e saj.
Gazmend Bardhi tha se grupi i tij nuk do të shkojë në këtë pritje, ndërsa Jorida Tabaku, bëri këtë koment në seancën plenare:
“Do kish qenë normale që parlamenti t’i uronte mirëseardhjen por edhe kjo vizitë po trajtohet si një vizitë private”
Në një komunikim me ABC News, ajo tha se nuk e kishte vendosur ende nëse do të pranonte ftesën e Kryeministrit.
Duket PD-ja e vulës do të vendosë në minutat e fundit dhe ngelet e paqarte, por jo surprizë edhe nëse Lulzim Basha do të pranojë të shfaqet pranë Edi Ramës.
Ndersa komplekset e demokratëve zyrtarë bëhen gjithnjë e më komplekse, marrëdhënia e qeverisë me Sali Berishën, është e qartë:
Sonte nuk ka asnjë ftesë për të apo Foltoren e tij. Mysafiri i Tiranës, i bën hijë vatrës së zbrazët të kryeministrit të Prishtinës.
Në këto ditë të vështira për Albin Kurtin dhe izolimin diplomatik të tij, nuk u duk asnjë shkëndijë për shtërngimin e duarve të kreut të Vetvendosjes, me amerikanin që bëri të mundur ëndrrën për pavarësi në Kosovë.
Asnjëra nga qeveritë, as e Ramës e as e Kurtit nuk treguan nëse ishte ftuar në këtë ceromoni edhe kryeministri i Kosovës.
Por përfundimi dihet: Albin Kurti nuk do të jetë në Tiranë./m.j
