Një marrëveshje e mundshme mes SHBA-së dhe Iranit mund të sjellë zgjatjen e armëpushimit për 60 ditë dhe ndërprerjen e operacioneve ushtarake në të gjitha frontet, përfshirë edhe Libanin, raporton CBS News.
Sipas draftit të memorandumit të mirëkuptimit, i cili pritet të miratohet nga Teherani, parashikohen disa pika kyçe që synojnë uljen e tensioneve në Lindjen e Mesme.
Mes tyre përfshihen zgjatja e armëpushimit aktual me 60 ditë, hapja e menjëhershme e Ngushticës së Hormuzit nga Irani dhe rikthimi i lundrimit detar në nivelet para luftës brenda 30 ditëve.
Po ashtu, drafti parashikon një deklaratë të përbashkët mes SHBA-së, Iranit dhe aleatëve të tyre për ndalimin e menjëhershëm dhe të përhershëm të të gjitha operacioneve ushtarake në rajon, përfshirë Libanin.
Në dokument thuhet gjithashtu se asnjëra palë nuk do të nisë luftë apo të kërcënojë me përdorimin e forcës, ndërsa Irani do të riafirmojë angazhimin se nuk do të zhvillojë armë bërthamore.
Një tjetër pikë e rëndësishme lidhet me largimin e rezervave të uraniumit të pasuruar, përmes një mekanizmi që do të dakordësohet nga të dyja palët.
Sipas raportimit, zhbllokimi i aseteve iraniane të ngrira dhe heqja e sanksioneve do të varen nga respektimi i këtyre kushteve nga Teherani.
Një zyrtar i lartë amerikan konfirmoi për CBS News shumicën e pikave të draftit, por nuk komentoi mbi ndalimin e operacioneve ushtarake në Liban dhe zgjatjen 60-ditore të armëpushimit.
Ndërkohë, përpjekjet diplomatike janë intensifikuar ditët e fundit. Ministri i Jashtëm iranian ndodhet në Doha për bisedime me autoritetet e Katarit, ndërsa Sekretari amerikan i Shtetit, Marco Rubio, deklaroi nga Nju Delhi se SHBA do t’i japë “çdo mundësi diplomacisë” para se të shqyrtojë opsione të tjera ndaj Iranit.
Edhe Donald Trump reagoi përmes një postimi në Truth Social, ku u shpreh se negociatat “po ecin mirë”, por paralajmëroi se në rast dështimi mund të ketë sulme të reja.
“Ose do të ketë një marrëveshje të madhe për të gjithë, ose nuk do të ketë fare marrëveshje”, shkroi Trump.
Sipas burimeve, bisedimet në Doha janë fokusuar kryesisht te Ngushtica e Hormuzit dhe rezervat iraniane të uraniumit të pasuruar, ndërsa në diskutime është përfshirë edhe mundësia e zhbllokimit të fondeve iraniane të ngrira jashtë vendit.
Nga ana tjetër, zëdhënësi i Ministrisë së Jashtme iraniane, Esmail Baghaei, deklaroi se memorandumi përfshin 14 pika dhe fokusohet në përfundimin e luftës dhe të bllokadës detare amerikane në Ngushticën e Hormuzit.
Ndërkohë, Irani njoftoi se ka rrëzuar një dron “armik” me një sistem të ri të mbrojtjes ajrore, pa dhënë detaje mbi origjinën e tij.
