Deri në mesditë pjesa më e madhe e vendit do të dominohet nga alternime kthjellimesh dhe vranësirash duke rrezikuar edhe shira të përkohshëm, më të mundshme në zonat jugore dhe juglindore ku herë pas here do të ketë rrebeshe.
Parashikohet që kushtet e paqëndrueshme atmosferike të mbeten prezent edhe gjatë pasdites duke bërë që vranësirat dhe shirat të jenë dominuese në pjesën më të madhe të territorit. Në majat e maleve reshjet do të shfaqen edhe me flokë dëbore.
Sipas MeteoAlb, temperaturat e ajrit do të pësojnë rënie të ndjeshme në të dy vlerat ekstremale të ditës. Era do të fryjë mesatare në tokë dhe deri e fortë në det me shpejtësi 45 km/h nga drejtimi veriperëndimor, për pasojë në brigjet detare do të ketë dallgëzim 4 ballë.
Europa
Zhvillimi i një qendre të fuqishme ciklonare në veri-verilindje të kontinentit do të kushtëzojë mot të paqëndrueshëm në këto rajone. Konkretisht: me vranësira dhe reshje shiu si edhe reshje të pakta dëbore do të paraqitet moti për vendet Lindore.
Ndërsa, vranësira dhe shira të përkohshëm do të ketë në Europën Juglindore si edhe një pjesë të gadishullit të Ballkanit. Moti i kthjellët do të jetë dominues për gadishullin Iberik, ishujt britanike si edhe Europën qendrore./noa/a.k
