Greqia nuk i ndal kërcënimet ndaj Shqipërisë. Sa herë mes vendeve ka tension për çështje që lidhen kryesisht me çështjen çame apo me minoritetin grek në Jug, shteti helen nxjerr kartën e integrimit dhe kërcënon Shqipërinë me bllokim të procesit.
Çështja e fundit që ka sjellë sërish tension është ajo e prishjes së dy ndërtesave në Dhërmi, për të cilat Greqia pretendon se shkelen të drejtat e minoritarëve.
Pas përplasjes me deklarata mes vendeve, ka reaguar edhe presidenti grek, i cili ka nxjerrë të njëjtën kartë për të kërcënuar: integrimin!
Presidenti grek Prokopis Pavlopulos nga veriu i Greqisë, tha se Shqipëria duhet të përmbushë dhe të respektojë detyrimet ndaj minoritetit grek si kusht për t’u anëtarësuar në BE.
“Shkelja provokuese e të drejtës së pronës për bashkatdhetarët tanë nga autoritetet shqiptare mban larg perspektivën europiane të Shqipërisë”, tha ai.
Deklaratat e presidentit grek u bënë nga Preveza, ku u zhvillua kongresi i zakonshëm botëror i Epirit siç quhet në Greqi.
“Nuk duhet të harrohet se pakicës etnike greke duhet t’i respektohet në Shqipërinë fqinje çdo e drejtë ashtu siç u ka hije qytetarëve që jetojnë në sundimin e regjimit të ligjit”, tha presidenti grek. Të gjithë duhet të ndiejnë se jetojnë në një shtet të së drejtës dhe se sundimi i ligjit nuk është një grumbull gurësh”, shtoi ai. “Në Europë nuk ka standarde të ndryshme për vende të ndryshme, ajo i ka të qarta kushtet për shtetet që duan të bëhen pjesë e ndërtimit europian”, u shpreh politikani i lart grek./a.m.
