Banorët që preken nga projekti i Bulevardit të ri të Tiranës kanë protestuar sërish sot për të kundërshtuar vendimin e bashkisë së Tiranës për prishjen e banesave të tyre. Banorët të irrituar u shprehën se për të gjetur një zgjidhje, kanë bërë edhe një propozim që lidhet me ndërtimin e një pallati ku të strehohen familjet që shpronësohen. Por, kjo kërkesë sipas tyre nuk është pranuar nga kryebashkiaku Erion Veliaj. Ata shprehen se do të vijojnë protestat deri në mosbindje civile, pasi nuk kanë vend se ku të strehohen.
“Bashkia nuk e pranoi kërkesën tonë. Ne jemi para një fakti të kryer. Ne nuk bëjmë presion, protestojmë për të drejtën tonë. Hajde të gjejmë zgjidhje për ligje që ka vendosur shteti shqiptar. Në momentin që s’kemi zgjidhje, jemi për mosbindje civile”, deklaruan banorët.
Ata i bënë thirrje kryeministrit dhe trupit diplomatik që të gjejnë zgjidhje për këtë çështje.
“Kryeministri të shikojë problemin, të sjellë stafin për verifikim. Apel trupit diplomatik. I bëjmë thirrje njerëzore. Shteti shqiptar po na i merr shtëpitë badihava”, pohuan banorët.
