Edhe pse Bashkia e Poliçanit nuk njihet për ngjarje kriminale, duket se qetësia është prishur pas shumë kohësh.
Një 77- vjeçar është vrarë me thikë pasditen e sotme rreth 20 kilometra larg nga qyteti.
Ai është Ramadan Çela ndërkohë që policia ka prangosur shtetasin H.Ç 37 vjeç si autorin e dyshuar të krimit. I arrestuari është edhe i afërm i viktimës.
Raportohet se vrasja ka ndodhur pas një konflikti të çastit ndërkohë që grupi hetimor pritet të japë më tepër detaje.
NJOFTIMI NGA POLICIA
Policia identifikon dhe vë në pranga autorin e vrasjes me thikë të 77-vjeçarit.
Rreth orës 17:30, në fshatin Jaupas, Skrapar, shtetasi H. Ç., 37 vjeç, pas një konflikti për motive të dobëta, ka qëlluar me mjet prerës (thikë) komshiun e tij që ndodhej vetëm në banesë, shtetasin R. Ç., 77 vjeç, i cili për pasojë ka ndërruar jetë.
Menjëherë pas marrjes së informacionit për ngjarjen e ndodhur, shërbimet e Komisariatit të Policisë Skrapar kanë rrethuar zonën dhe falë reagimit të menjëhershëm dhe informacioneve të marra në rrugë operative kanë bërë të mundur identifikimin dhe arrestimin e autorit.
Në cilësinë e provës materiale grupi hetimor ka sekuestruar armën e krimit, një mjet prerës (thikë).
Grupi hetimor, nën drejtimin e Prokurorisë po punon për zbardhjen e plotë të rrethanave të ngjarjes.
/a.r
