Deputeti i Partisë Socialiste Etjen Xhafaj i ftuar në studion e RTSH 24 ka deklaruar se komunikimi me të gjithë aktorët dhe faktorët për të mundësuar ndërlidhjen e problematikave të qytetarëve me zgjidhjet, do të vijojë të jetë në fokus të socialistëve edhe në procesin për zgjedhjet parlamentare të 2025-ës. PS, u shpreh Xhafaj, do të bëjë fushatë me të gjitha palët.
“Janë zgjedhje të përgjithshme. Zgjedhjet kanë të bëjnë me 140 deputetët. Sesioni i pranverës që do të jetë sesioni i fundit i legjislaturës së dhjetë do jetë ajo që do e ndjejë më tepër. Do jetë fushata e komunikimit me të gjitha palët. PS e ka nisur këtë proces që me zgjedhjet e 2021-shit. Për ne është vazhdimësi e asaj që kemi bërë gjithë këto vite, komunikim me aktorët dhe faktorët kudo ndodhen për të mundësuar ndërlidhjen e problematikave të qytetarëve me zgjidhjet, reformat, politikat që po çohen para nga qeveria”, deklaroi deputeti.
Pyetur mbi qasjen e socialistëve me opozitën, referuar edhe ndryshimeve të Kodit Zgjedhor votuar sesionin e kaluar edhe me votat e opozitës, Xhafaj u shpreh se Partia Socialiste ka qenë gjithnjë dora e shtrirë ndaj opozitës.
Deputeti deklaroi se mazhoranca i ka bërë gjithnjë thirrje opozitës në lidhje me prioritetet kombëtare, sikurse është integrimi, siguria kombëtare dhe stabiliteti i vendit.
“Qasja jonë ka qenë gjithnjë ajo e dorës së shtrirë. Qasja vijon të mbetet ajo. I kemi bërë thirrje gjithnjë për prioritetet kombëtare,: integrimi, siguria kombëtare, stabiliteti I vendit, ekonomik, financiar, i faktorëve që kanë të bëjnë me jetesën e qytetarëve.
prioriteti I opozitës është të tregojë e polarizojë sa më tepër që të maksimalizojë rezultatin e tyre elektoral në zgjedhjet e radhës. Kodi zgjedhor u ndryshua në bashkëpunim”, u shpreh ai.
Më tej ai theksoi se prioritet i mazhorancës është realizimi i zgjedhjeve më të mira se ato të prillit të 2021-shit.
“Prioriteti ynë është që të kemi zgjedhje më të mira se herën e fundit. Të adresojmë problematikat e OSBE/ODIHR, shqetësimet e Kushtetueses dhe për këtë pranuam edhe atë që ishte miniaturë e reformës zgjedhore që ne donim të ishte e implementuar”, theksoi ai.
/a.r
