Përqindja e prindërve dhe kujdestarëve ligjorë të fëmijëve në Shtetet e Bashkuara që refuzojnë injeksionin standard të vitaminës K për foshnjat e porsalindura është rritur ndjeshëm këtë vit, sipas një analize ekskluzive të të dhënave të kryer për Reuters, duke vënë më shumë foshnja në rrezik për episode hemorragjie, që janë kërcënuese për jetën.
Të dhënat konfirmojnë atë që mbi dhjetë pediatër, neonatologë dhe specialistë të kujdesit intensiv pediatrik i thanë Reuters se është një shqetësim kryesor: rritja e refuzimit të një injeksioni që mbron jetën dhe një valë në rritje mosbesimi ndaj vaksinave dhe ndërhyrjeve të tjera mjekësore për të porsalindurit.
Për dekada me radhë, Sekretari i Shëndetësisë, Robert F. Kennedy Jr., ka nxitur këtë mosbesim, duke hedhur dyshime mbi vaksinat dhe trajtime të tjera të mirënjohura mjekësore. Përshpejtimi i refuzimit të vitaminës K këtë vit përkon me njoftimin e tij në janar për heqjen e rekomandimeve për gjashtë vaksina standarde të fëmijërisë, përfshirë vaksinën kundër hepatitit B, e cila u jepet foshnjave në lindje.
Përqindja e të porsalindurve që nuk e morën injeksionin e vitaminës K brenda një dite nga lindja u rrit me më shumë se 57% nga janari në qershor, sipas një analize të të dhënave shëndetësore për më shumë se 1 milion lindje në mbarë vendin, të kryer nga kompania e të dhënave dhe analizave shëndetësore Truveta.
Ndërsa refuzimi i vitaminës K ka qenë në rritje prej vitesh, analiza e Truveta-s tregon se në gjysmën e parë të vitit 2026, ritmi i rritjes ishte 2,5 herë më i lartë se në periudhën janar-qershor 2025. Krahasuar me vitin 2019, rritja ishte 309% më e lartë.
Prindërit por refuzojnë gjithmonë e më shumë
Foshnjat lindin me nivele shumë të ulëta të vitaminës K, e cila ndihmon në mpiksjen e gjakut, dhe mbeten të pambrojtura ndaj mungesës së saj deri rreth moshës gjashtë muajshe, sipas Qendrave për Kontrollin dhe Parandalimin e Sëmundjeve (CDC), përcjell A2 CNN. Pa injeksionin, foshnjat kanë 81 herë më shumë gjasa të pësojnë hemorragji kërcënuese për jetën, në tru ose në zorrë, gjatë gjashtë muajve të parë të jetës, sipas CDC-së.
Një në pesë foshnja që përjetojnë një hemorragji të rëndë do të vdesë. Pa injeksionin, hemorragji të tilla ndodhin në një nga çdo 59 lindje.
“Është zhgënjyese”, tha për Reuters Dr. Allison Bartlett, shefe e përkohshme e sëmundjeve infektive pediatrike në Comer Children’s Hospital dhe profesoreshë e pediatrisë në Universitetin e Çikagos. “Të gjithë ne, pediatrit, kemi kaluar dekada duke mësuar se si të mbrojmë fëmijët dhe fakti që kjo ekspertizë shpërfillet në favor të historive që njerëzit tregojnë është vërtet sfiduese për ne”.
Pediatrit si Heard-Garris janë në vijën e parë të kujdesit për fëmijët, ndërsa prindërit përballen me ndryshimet në politikat shëndetësore të SHBA-së për t’i përshtatur ato me pikëpamjet e Kennedy-t dhe Presidentit Donald Trump, të cilat shpesh bien ndesh me qëndrimet e komunitetit mjekësor.
Kur Kennedy hoqi rekomandimet për gjashtë vaksinat e fëmijërisë, ai tha se fëmijët amerikanë merrnin shumë injeksione dhe sugjeroi se ato ishin të lidhura me sëmundje kronike.
Këto ndryshime janë pezulluar për shkak të një vendimi gjykate, por Trump bëri sërish thirrje për to në një urdhër ekzekutiv të 10 gushtit. Ekspertët thonë se këto mesazhe kontradiktore kanë shtuar dyshimet te shumë prindër për trajtimet rutinë të të porsalindurve, përfshirë vitaminën K.
Kur u pyet në një seancë dëgjimore në Kongres në prill nëse rënia e mbështetjes për vitaminën K lidhej me këto politika, Kennedy mohoi të kishte ndonjë rol.
Zëdhënësja e Departamentit amerikan të Shëndetësisë dhe Shërbimeve Njerëzore (HHS), Grace Davis Jamison, tha se agjencia dhe CDC-ja po vlerësojnë të dhënat dhe informacionet e disponueshme lidhur me refuzimin e vitaminës K dhe rastet e hemorragjive që lidhen me të.
Ajo tha se departamenti vijon t’u ofrojë prindërve dhe profesionistëve të shëndetësisë informacion mbi vitaminën K.
“Shqetësimet për vitaminën K dhe rënia e besimit te institucionet e shëndetit publik i paraprijnë kësaj administrate dhe u rritën gjatë pandemisë së COVID-19, mes detyrimeve të ashpra të vendosura nga administrata Biden”, tha ajo, duke shtuar se agjencia po punon për të rikthyer besimin, ndër të tjera përmes respektimit të zgjedhjes individuale.
