Për arsye sigurie, princi Reza Pahlavi nuk tregon se në cilin qytet ndodhet.
Dihet vetëm se është në Shtetet e Bashkuara dhe se, për momentin, nuk ka të planifikuar një takim me presidentin amerikan, Donald Trump. Mes thirrjeve të protestuesve iranianë dëgjohen edhe sloganet: “Pahlavi do të kthehet” dhe “Rroftë mbreti”.
Corriere Della Sera shkruan se ka shkëmbyer ca e-maile me të, ku flet edhe për planin e tij menjëherë pas largimit të Ali Khamenei-t. Ai nuk është kthyer në Teheran prej 47 vitesh dhe pyetje-përgjigjet e mëposhtme mund t’ju zbulojnë diçka më shumë mbi ambiciet e tij.
Skenari: Republika Islamike bie dhe ju ktheheni në Iran. Çfarë bëni?
“Ne kemi tashmë një plan dhe nuk do të ketë boshllëk pushteti. Jemi përgatitur prej vitesh për këtë moment. Projekti ynë ‘Iran Prosperity’ ka udhëzime të qarta. Faza e parë do të jetë ajo e emergjencës, për të garantuar për 180 ditët e para vazhdimësinë e shërbimeve dhe sigurinë. Më pas vjen faza e stabilizimit: funksionimi normal i shtetit, shërbimet bazë, rikthimi i besimit në ekonomi dhe një drejtim i përkohshëm i vendit. Në fund do të nisë procesi kushtetues dhe zgjedhjet kombëtare.”
Çfarë është projekti “Iran Prosperity”?
“Është një nismë që unë drejtoj dhe që paraqet një plan të detajuar për rimëkëmbjen ekonomike dhe rikthimin e Iranit në komunitetin ndërkombëtar. Kemi mbi 100 ekspertë brenda dhe jashtë vendit. Po punoj gjithashtu me sipërmarrës të suksesshëm dhe profesionistë nga e gjithë bota.”
Pra, një plan për zgjedhjet?
“Qëllimi nuk është thjesht të mbijetojmë gjatë tranzicionit. Synimi është të çlirojmë potencialin e vërtetë të Iranit. Një Iran i lirë mund të jetë i begatë: një vend që tregton me botën, tërheq investime, krijon vende pune dhe u jep të rinjve një të ardhme në atdhe, jo arsye për t’u larguar.”
Si mund ta rrëzojnë protestat regjimin e ajatollahëve?
“Mijëra njerëz iu përgjigjën thirrjes sime dhe dolën në rrugë. Tani kemi hyrë në një fazë të re, ku iranianët po rimarrin rrugët dhe lagjet e tyre. Sa më shumë rriten turmat, aq më shumë dobësohet aftësia e regjimit për të shtypur protestat. Gjithnjë e më shumë pjesëtarë të forcave të sigurisë dhe të institucioneve do të zgjedhin të qëndrojnë me popullin. Bashkësia ndërkombëtare mund të luajë një rol të rëndësishëm duke mbrojtur civilët, duke parandaluar ndërprerjen e internetit dhe duke bërë të qartë se dhuna masive do të ketë pasoja.”
Për këtë arsye i keni kërkuar Trumpit të ndërhyjë?
“Fjalët e mbështetjes së Trumpit për popullin iranian kanë rëndësi. Ato u kanë dhënë kurajo atyre që rrezikojnë jetën për liri. Ky moment nuk do të ekzistonte pa presionin ndaj regjimit islamik. Ajatollahët thërrasin ‘Vdekje Amerikës’, ndërsa iranianët duan një vend të lirë, në paqe edhe me SHBA-të dhe Izraelin.”
Po ndodh një masakër. Çfarë lloj ndërhyrjeje kërkoni?
“Regjimi ka vrarë mijëra civilë. Për ne, mbështetja e SHBA-ve për të mbrojtur civilët dhe për të ndalur makinerinë shtypëse është e mirëpritur. Nuk nevojiten trupa të huaja në terren, por veprime që t’i pengojnë forcat e sigurisë të vazhdojnë dhunën kundër popullit. Negocimi me një diktaturë nuk sjell paqe.”
Disa kanë frikë se kthimi juaj do të thotë rikthim i monarkisë...
“E them qartë: roli im nuk është të anoj nga monarkia apo republika. Do të jem i paanshëm. Dua që iranianët të kenë më në fund të drejtën të zgjedhin lirshëm.”
Pse kjo kryengritje është ndryshe nga të mëparshmet?
“Republika Islamike është më e dobët se kurrë. Për herë të parë në 46 vjet, kërkesa është e qartë dhe mbarëkombëtare: fundi i këtij regjimi kriminal. Jam thellësisht mirënjohës ndaj bashkatdhetarëve të mi që thërrasin emrin tim. Për mua nuk bëhet fjalë për pushtet, por për shërbim ndaj vendit dhe popullit tim. Mbështetja e tyre e madhe më ngarkon me përgjegjësi, prandaj jam vënë në krye të këtij lëvizjeje dhe këtij tranzicioni, me thirrjen e tyre.”
A ekziston rreziku i një revolucioni të papërfunduar?
“Kanë nisur largime nga radhët e regjimit, përfshirë refuzimin për të shtypur protestat, dhe ne po punojmë për ta përshpejtuar këtë proces. Edhe klima ndërkombëtare ka ndryshuar. Në të kaluarën, iranianët kërkonin mbështetje dhe gjenin heshtje. Sot po rritet bindja se ky regjim nuk mund të reformohet. Kur populli iranian mbështetet në luftën e tij për liri, rezultati bëhet i pashmangshëm.”
Cila është frika juaj më e madhe?
“Që vuajtjet e popullit tim të vazhdojnë dhe që brezat e ardhshëm të mos jenë të lirë. Por ndiej se ndryshimi po vjen. Prandaj kam dalë përpara për të udhëhequr. I kërkoj botës të qëndrojë përkrah popullit tim.”
