Djali i mërguar i shahut të fundit iranian u ka bërë thirrje vendeve të botës të ndihmojnë protestuesit për të rrëzuar qeverinë e Iranit, duke thënë se është i bindur se “Republika Islamike do të bjerë” dhe se nuk bëhet fjalë “nëse, por kur”.
Reza Pahlavi, një lider opozitar me bazë në SHBA, kërkoi nga bota të godasë udhëheqjen e Gardës Revolucionare të Iranit, gjë që sipas tij “do të lehtësonte detyrën tonë dhe do të parandalonte më shumë humbje jete”.
Më shumë se 2 mijë e 500 protestues janë vrarë, sipas një grupi të të drejtave të njeriut, në demonstratat që nisën për shkak të ekonomisë më 28 dhjetor dhe u shndërruan në thirrje për fundin e sundimit të Udhëheqësit Suprem të Iranit, Ali Hosseini Khamenei.
Qeveria iraniane i ka quajtur protestat “trazira” të mbështetura nga armiqtë e Iranit.
Pahlavi është shfaqur si një figurë e rëndësishme në opozitën e fragmentuar iraniane dhe më parë u ka bërë thirrje iranianëve të intensifikojnë protestat e tyre.
Por protestuesit janë përballur me forcë vdekjeprurëse nga autoritetet, të shoqëruara me një ndërprerje pothuajse totale të internetit dhe shërbimeve të komunikimit.
Presidenti amerikan Donald Trump ka paralajmëruar qeverinë e Iranit kundër vrasjes së protestuesve, duke u thënë demonstruesve më herët këtë javë se “ndihma është rrugës”.
Në një intervistë për CBS News, Trump tha se SHBA-të do të ndërmerrin “veprime shumë të forta” kundër Iranit nëse ekzekutonte protestues.
Më pas ai tha se i kishin thënë se “vrasjet kanë ndaluar”, por nuk e përjashtoi veprimin ushtarak kundër vendit.
Kryetari i parlamentit iranian kishte paralajmëruar se nëse SHBA-të do të sulmonin, si Izraeli ashtu edhe qendrat ushtarake dhe të transportit të SHBA-ve në rajon do të bëheshin objektiva legjitimë.
SHBA-të dhe Britania e Madhe kanë reduktuar numrin e personelit në bazën ajrore Al-Udeid në Katar, me zyrtarë që i thanë CBS News se kjo ishte një “masë paraprake”.
Duke folur të premten në një konferencë për shtyp në Uashington, Pahlavi pretendoi se pjesë të aparatit të sigurisë së Iranit kishin refuzuar të merrnin pjesë në shtypjen e protestave dhe se autoritetet iraniane kishin sjellë luftëtarë nga milici të huaja për të shuar demonstratat.
Ai u bëri thirrje vendeve të botës të godasin Gardën Revolucionare të Iranit dhe infrastrukturën e komandës dhe kontrollit, duke kërkuar një “goditje kirurgjikale”. Po ashtu kërkoi nga fuqitë globale të ushtronin presion ekonomik, të dëbonin diplomatët iranianë, të kërkonin lirimin e të gjithë të burgosurve politikë dhe të vendosnin internet satelitor Starlink dhe komunikime të sigurta për të mundësuar lidhjen në Iran.
“Me ose pa ndihmën e botës, regjimi do të bjerë,” tha Pahlavi, citon BBC. “Do të bjerë më shpejt dhe më shumë jetë do të shpëtohen nëse bota i kthen fjalët në veprime.”
Ai gjithashtu premtoi të kthehej në Iran dhe paraqiti një plan për krijimin e një kushtetute të re në vend.
I pyetur për udhëheqjen e ardhshme në Iran, Pahlavi tha: “Për këtë i takon popullit iranian të vendosë”.
Pahlavi tha se mbështet një program qeverisës të bazuar në parimet e integritetit territorial të Iranit, ndarjes së fesë nga shteti, lirive individuale dhe të drejtës së popullit iranian për të vendosur mbi formën e qeverisjes demokratike që dëshiron.
